Шимкент шаҳрини ривожлантириш Бош режасига кўра бир кеча-кундузда 20 минг йўловчи ўтказадиган янги темирйўл вокзали қурилади.

Замонавий намунада бунёд этиладиган шаҳардаги иккинчи темирйўл бекатининг техник қурилиш режасини вилоят ҳокими Ж. Туймебаевга “Алоқа йўлларини ривожлантириш илмий-тадқиқот институти” МЧБ директори А. Ўразбеков таништирди. 

Шимкент шаҳрининг Бош режа­­­сига мувофиқ “Ғарбий Европа – Ғарбий Хитой” халқаро транспорт даҳлизининг бўйида амалга ошириладиган лойиҳа доирасида “Шимкент-2” янги темирйўл вокзали ва юкни саралаш станцияси ҳамда катта автовокзал қурилиши мўлжалланмоқда. Шу билан бирга, умумий майдони 16 гектарни ташкил этадиган темирйўл бекати қошида меҳмонхона ва маъмурий бино, 1000та автоуловга мўлжалланган автотураргоҳ ҳам  режаланган.

Лойиҳа раҳбари Шимкент шаҳрининг 2020 йилда БМТ мамлакатларининг маданий пойтахти бўлиши  муносабати билан темирйўл вокзалини шу санага фойдаланишга топширишини айтди. 

Ўз сўзида вилоят ҳокими ушбу ло­йи­­­­­­ҳанинг ижтимоий аҳамияти зўр эка­нини ва йўловчиларга хизмат кўр­­­­сатишни яхшилаш ҳамда сайёҳ­ларни минтақага жалб этиш учун барча  ша­роит­­лар яратилишини таъкидлади. Шу муносабат билан тегишли идора раҳбарларига лойиҳани амалга оши­риш учун ишчи гуруҳи тузишни топ­ширди. 

Ҳозирги кунда лойиҳа республика давлат-хусусий ҳамкорлиги лойиҳа­ларини режалаш алгоритмига мувофиқ Қозоғистон Республикаси ваколатли давлат ташкилотлари билан ишни мувофиқлаштириш поғонасида ту­рибди.