1993 йилги битирувчилардан туҳфа

Биз Қарноқ қишлоғидаги (собиқ Карл Маркс) Маҳмуд Қошғарий номли мактабни 1993 йили тамомлаб мустақил ҳаётга қадам қўйдик. Дилором Орзуметова, Ғайбулла Сайдуллаев, Замира Ҳабибова, Қундуз Шарипова, Маҳмуда Жўраева, Сарви Аҳмедова, Ғофир Низомов каби заҳматкаш устозларимиздан олган билим, сабоқ ва ўгитларни ҳаётда қўллаб кам бўлмадик. Қандай ютуққа, зафарга эришган бўлсак замирида мактаб аталмиш муқаддас маскан, улуғ устозларимиз хизматини ёдда тутдик. 

Жорий йили мактабимиз бир асрлик шодиёна юбилейини нишонлашга ҳозирлик кўрмоқда. Биз Дилмурод Ҳакимов, Ҳакимжон Исаев, Санжар Ёқубов, Элмурод Фозилов, Мақсад Абдурасулов, Максим Абжамиев, Шерзод Абдужабборов каби ўнлаб собиқ битирувчилар ирмоқлар бирлашса дарё бўлур, қабилида ҳашар йўли билан қадрдон мактабимизга, бугунги ўқувчилар саломатлиги учун футбол ўйингоҳини қуриб, фойдаланишга топширдик. Умумий майдони 450 квадрат метрни ташкил этувчи, зарур анжомлар билан жиҳозланган ўйингоҳ атрофи баланд симтўр билан қуршалган, майдонга махсус қум тўшалган. Ҳимматларнинг энг олийси толиби илмга кўрсатилгани экан. Шу боис ҳимматли битирувчилар сафи кенгайиб ишчан ташкилотчи Артур Асоев раҳбарлик қилаётган Маҳмуд Қошғарий номли мактабимиз муҳташам, обод, кўркам ҳамда пешқадам илм даргоҳи сифатида танилаверишига ишончимиз комил.