Мақтааралнинг тарвузини Ёқутистонда хуш кўришади

Жорий йили Мақтаарал туманида полиз маҳсулотлари ўтган йилгидан 10-15 кун аввал етилиб, деҳқонлар дастлабки қовун-тарвузни қўшни Россия давлатига экспортга чиқарди. Тарвузи биринчи бўлиб пишганлар қаторида “Абиш ота” хўжалиги ҳам бор. Бир кунда 20 тонна маҳсулотни савдога чиқарган хўжалик жорий йили 3 гектар ерга тарвуз экиб, гектаридан 30 тонна ҳосил олишни мўлжалламоқда. 

– Ҳосилимизнинг 20 тоннасини қирғизистонлик тадбиркорлар килосига 140 тенгедан тўлаб, Ёқутистонга олиб кетишни мўлжаллашмоқда, – деди хўжалик раиси Бўрехан Абишев.

Жорий йили Мақтааралда 19500 гектарга қовун, 8 минг гектарга тарвуз экилган. Булар орасида эртапишар қовун пайкаллари 7800 гектарни, тарвуз – 5400 гектарни ташкил этади. 

Қирғизистонлик Равшан Ҳакимов 10 йилдан бери Мақтаарал туманининг миришкорлари билан узвий алоқада фаолият юритиб келади. 

Дунёдаги энг ширин қовун-тарвузлар шу минтақада етиштирилишини айтган тадбиркор бу маҳсулотларга Россияда талаб катта эканини таъкидлади. 

– Дастлабки тарвузни Россиянинг Якутск шаҳрида сотмоқчимиз. У ерга бориш учун камида 10 кун йўл юрамиз. Баҳонинг қандай бўлиши аниқ эмас. Мақтааралнинг қовун-тарвузини еганлар унниг баҳосига унча аҳамият беришмайди, – деди Р. Ҳакимов.