“Комбот Айкидо” халқаро ҳамжамияти Осиё ассоциациясининг раиси, қора камар соҳиби, мамлакатимизда жеткундо спорт турини ривожлантиришга улкан ҳисса қўшиб келаётган Мурод Умаров ҳар гал таҳририятга қувончли хабар билан келади. Навбатдаги ташрифида ҳам шогирдларининг ютуғидан қувониб келганлигини яширмади. 

27-28 май кунлари Ўзбекистон Республикасининг Бекобод шаҳрида ўтган халқаро турнирда М. Умаров раҳбарлигидаги Қозоғистон ўқувчилар терма жамоаси умумжамоа ҳисобида биринчи ўринни эгаллади. Қўшни республикада ўтган мусобақада Диёра Салибекова, Султонбек Исроилов, Мақсад Абдукаримов, Мирас Усмонов, Алмас Салибеков, Асет Анарбаев, Азамат Салибековлар шоҳсупадан жой олдилар. 

Талабчан мураббийнинг айтишича, унинг шогирдлари 21-24 июнь кунлари Тошкент шаҳрида ўтадиган Осиё чемпионатига тайёргарликни бошлаб юборишибди. Унда 12та давлатдан спортчилар иштирок этади. Қозоғистон терма жамоаси тўлиқ таркибда қатнашади. Терма жамоанинг 38 аъзосидан 22 нафари М. Умаров қўл остида Қайнарбулоқдаги спорт мажмуасида шуғулланмоқда.

– Мақсадимиз Қозоғистон байроғини юксакларга кўтариб, Ватанимиз довруғини ошириш. Албатта, улкан ютуқларга осонликча эришилаётгани йўқ. Қатъий тартиб, интизомсиз спортда натижага эришиш қийин, – дейди биз билан суҳбатда М. Умаров.

Жаҳон, Осиё чемпионларини, 12 нафар спорт устасини тайёрлаган М. Умаров халқаро мусобақаларда муваффақиятга эришаётган ёш спортчиларни қўллаб-қувватлашни истовчи ҳомийларни ҳамкорликка чақиради.