Жорий йилнинг биринчи июлидан бошлаб пенсионерларнинг нафақаси кўпаяди. Сабаби, базавий пенсия қайта ҳисобланиб, янги шаклда тайинланади. Бу ўзгариш пенсия олувчиларга ҳам, бўлажак пенсионерларга ҳам тегишли.
1 июлдаги ўзгаришлар ҳақида газетамизда ёзганмиз. Бироқ пенсияни ҳисоблашдаги янги тартибни ҳали тушуниб улгурмаган муштарийларимизнинг илтимосига кўра, ваколатли органдан саволларимизга жавоб олиш учун “Ижтимоий тўловларни маҳкамалараро ҳисоблаш” маркази ЖҚВФ директорининг ўринбосари Несибели Қаражановага мурожаат қилдик.
– Базавий пенсия деганимиз нима?
– 1 июлдан бошлаб барча нафақадорларга бирдек тўланиб келинган базавий пенсия қийматида муайян ўзгаришлар бўлади. Энди базавий пенсия миқдори меҳнат стажига қараб тайинланади. Базавий пенсия – Элбошининг 2005 йилдаги Мактуби асосида нафақага чиққан фуқаролар ва пенсия ёшига етган ногиронларга тайинланади. Бугунги кунда унинг миқдори – 15 274 тенге. Бу миқдор пенсия тизимида иштирок этиш аризасига қарамай, тўланиб келган. Эндиликда базавий пенсиянинг миқдори – келишилган ҳамда жамғармавий тизимда қатнашиш даврига боғлиқ бўлади. Яъни, 1998 йилгача бўлган меҳнат стажи ва 1998 йилнинг 1 январидан кейин пенсия жамғармасига ўтказилган нафақа бадалларига асосланиб тайинланади.
Таъкидлаш жоизки, 1998 йилнинг 1 январигача тайинланган базавий пенсия пенсионернинг меҳнат дафтарчасидаги стажига мувофиқ қайтадан ҳисобланади.
– Базавий пенсия қандай ҳисобланади?
– Меҳнат стажи 10 йил ёки ундан кам бўлса, уларга яшаш минимумининг 54 фоизи тайинланади. Меҳнат стажи 10 йилдан кўпларга ҳар йил учун 2 фоиз устама қўшилади. Агар меҳнат стажи 20 йил бўлса, яшаш минимумининг 74 фоизи, меҳнат стажи 35 йил бўлса, 100 фоизи миқдорида бўлади.
Масалан, 1998 йилнинг 1 январигача –15 йил, ундан кейин – 16 йил меҳнат қилган кишига, базавий пенсия тайинлаш учун умумий – 31 йиллик меҳнат стажи қабул қилинади. Бу ҳолатда (31йил) 10 йили учун нафақадор кафолатланган 54 фоизга эга бўлади. Қолган 21 йили учун унга 2 фоиздан – 42 фоиз қўшилади. Шундай қилиб, 31 йиллик меҳнат стажига эга пенсионер 54га 42ни қўшганда, яшаш минимумининг 96 фоизи (тахминан 27153 тенге)ни олади. 1998 йилнинг 1 январидан кейинги меҳнат стажи омонат жамғармасига ўтказилган 10 фоизли пенсия бадалларининг тушумига қараб ҳисобланади.
Айтганча, ҳисоблашнинг янги усули бўйича имтиёзли шарт билан пенсияга чиққан фуқаролар, яъни 5 ҳамда ундан кўп боласи бор оналар, Семей полигони ҳудудида 1949-1963 йиллар оралиғида камида 5 йил яшаган фуқароларга базавий пенсия 63 ёшга тўлгандагина тайинланади.
ЭСЛАТМА: Базавий пенсияни қайта ҳисоблаш вақтида ҳеч қандай ҳужжатлар қабул қилинмайди. Барча маълумотлар базада тўлиқ сақланган. “Пенсиям тўғри ҳисобланмади” деб уни қайта ҳисоблатиш мумкин эмас. Бу ўзгартирилмайди.
– Қандай ҳужжатлар керак бўлади?
– Юқоридаги эслатма жорий йилнинг 1 июлидан пенсияга чиқадиган шахсларга тегишли эмас. Келажакда пенсия олиш учун ҳозирдан ҳужжатларингизни тайёрлаб боринг.
Бунинг учун:
1. 1998 йилгача бўлган иш стажини тасдиқлайдиган меҳнат дафтарчаси;
2. Омонат пенсия тизимига 1998 йилдан кейин узлуксиз ўтказилган пенсия тушумлари ҳақидаги маълумотнома керак.
Бундан ташқари нафақа тайинлаш учун:
1. Шахсий гувоҳнома.
2. Манзили ҳақида маълумотнома.
3. Банкдаги ҳисоб рақами.
4. Иш жойидан даромадини тасдиқлайдиган ҳужжат.
5. Ҳарбий билет.
6. Болаларнинг туғилганлиги тўғрисидаги гувоҳномалари.
7. Никоҳ гувоҳномаси.
8. Ўрта умумий маълумот тўғрисидаги аттестат.
9. Диплом талаб қилинади.
– Болани парваришлаш даври меҳнат стажига кирадими?
– Бу савол кўпчиликни қизиқтиради. Айниқса, аёлларни. Бола туғиб, уйда ўтирган аёллар хавотирланмасалар ҳам бўлади. Сабаби, бола туғиш ҳамда уни парваришлаш муносабати билан қонуний равишда декрет таътилида бўлган аёлларнинг 3 йили меҳнат стажига киради. Агар аёл бола парваришлагани учун 12 йилгача меҳнат муносабатида бўлмаса, барча болаларининг ораси – 3 ёшдан ошмаса, шу оралиқ ҳам унинг меҳнат стажига киради.
Масалан, бола парвариши учун олинган меҳнат стажи 01.01.98 йилгача 7 йил бўлса, аёлнинг 10.05.1999 ҳамда 14.10.2001 йили туғилган болалари бор бўлса, шу йиллар бола парвариши учун 12 йилдан ошмайдиган меҳнат стажи бўлиб ҳисобланади. 1998 йилгача туғилган болалар учун 7 йил меҳнат стажи бўлиб ҳисобланади. Декрет таътилидагилар учун умуман бошқа. Ишлаб юриб, декретга чиққан аёлларга бир ёшгача бола парвариши билан боғлиқ нафақа бадали ўтказилади. Умуман, мажбурий бадалнинг бир қисмини давлат суғурта жамғармаси ўтказса, қолгани республика бюджетидан субсидияланади. Бу аёлнинг бола парвариши муносабати билан декретда ўтирган йиллари (3 йилдан ошмаслиги керак) меҳнат стажига киради.
– Озодликдан маҳрум қилинганлар-чи?
– Озодликдан маҳрум қилинган даврни меҳнат стажига киритиш “ҚРда пенсия таъминоти тўғрисида” Қонунида кўрсатилмаган. Шунинг учун ҳам бу йиллар меҳнат стажига кирмайди.
Бинобарин, ҳарбийда бўлган давр мажбурий равишда меҳнат стажига киради.