Марказий коммуникациялар хизматида ўтган матбуот анжуманида Қозоғистон Республикаси Соғликни сақлаш вазири Елжан Биртанов Алматидаги М. Айқимбаев номидаги Қозоқ карантин ва зооноз инфекциялар илмий маркази базасидаги марказий референс-ташҳисхонанинг фаолияти ва менингитнинг тарқалиш орасида алоқа йўқлигини маълум қилди.

– Бу илмий марказ узоқ вақтдан буён фаолият юритади. Ана шу даврдан бери бу ерда ўта хавфли инфекцияларнинг штаммлари сақланади. Америкалик ҳам­касблар кўмагида хавфсизлиги юқо­ри замонавий ташҳисхона қурилди. Энди­ликда ана шу штаммлар хавфсизлик чора­ларига қатъий риоя қилинадиган жойда сақланмоқда, – деди вазир.

У менингит касаллиги аҳоли орасида кундаликда учрайдиган хасталик эканлигини айтди.

– Менингит ташҳисхонада сақланадиган касалликларнинг ўта хавфли тури ҳисоб­ланмайди. Бу ердан ҳеч қачон касаллик тарқалган эмас, – деди Е. Биртанов. – Шу боис фитнага ишонмасликларингизни сўранамиз.

Таъкидлаш жоизки, жорий йили Алматида менингит касаллигига дучор бўлганлар сони ортиб кетган. Умуман, йил бошидан буён Қозоғистонда менингит инфекциясини юқтирган 58 бемор рўйхатга олинган. Улар­нинг 18 нафари 14 ёшгача бўлган болалар.