Шимкент шаҳрида 4 қаватли мактаб қуришга рухсат берилди. Бу ҳақда шаҳар ҳокимлигида ўтган мажлисда шаҳар қурилиш бўлими раҳбари Абилсейит Рабаев маълум қилди.

Мажлисда 2020 йилгача шаҳарда авария ҳолатидаги ҳамда уч сменали мактаблар масаласи ҳал этилиши таъкидланди.

Бунинг учун 3000 ўқувчига мўлжалланган иншоотлар қурилиши керак, дейди мутахассислар.

Умуман, шаҳардаги қурилиш ишларининг барчаси белгиланган жадвал асосида амалга оширилади.

Чунончи, шаҳарда бугунги кунда 10та мактаб, 1 болалар боғчаси қурилмоқда ҳамда 4та мактаб таъмирланмоқда. Олтита мактабнинг бештаси жорий йилда фойдаланишга топширилади. Улар:

- Таскен даҳасидаги 600 ўқувчига мўлжалланган 103-сонли ўрта мактаб;

- Бўзариқ кичик туманидаги 900 ўринли мактаб қурилиши;

- Сайрам даҳасидаги 112-сонли ўрта мактабнинг 300 ўринли ўқув блоклари қурилиши;

- Қарабастау даҳасидаги 99-сонли ўрта мактабнинг 300 ўринли қўшимча қурилиши;

- 76-сонли ўрта мактабнинг ўқув биноси, ошхона, устахона ҳамда спорт зал қурилиши.

Мажлисда шаҳар қурилиш бўлими раҳбари А. Рабаев мактаб қурилишида деярли муаммолар йўқлигини  қайд этди.