«Нимани эксанг – шуни ўрасан». Нима экяпмиз ва нима оляпмиз? Нега сифатли тола кам етиштирилади, ҳар бир минтақанинг табиий иқлимига мос, серҳосил ғўза навларини яратиш, сара уруғ ҳозирлаш бўйича жойларда қандай аниқ чора-тадбирлар амалга оширилмоқда, нима сабабдан агрофакультет битирувчилари уруғчиликка қизиқмаяпти?
Мақола муаллифи ушбу саволларга жавоб топишга уриниб кўрди.
– Вилоятимизда пахтанинг 12 нави етиштирилади, – деди Жанубий Қозоғистон вилоят қишлоқ хўжалик экинлари навини синаш инспектураси раҳбари Б. Мирзабаев: . – Ундан 6 нав пахтачилик илмий-тадқиқот институтининг маҳсули. «Туркистон» ва «Туркистон1» навлари бор, уларнинг муаллифлиги ҚР экология ва экспериментал биология илмий-тадқиқот институтига тегишли. Бу навлар Туркистон минтақаси ва Қизилўрда вилоятида экилади. Навлардан энг эскиси – «С4727»нинг тозалигини сақлаш бўйича элита уруғи етиштирадиган хўжалик бўлмагани учун ҳозир унинг кондицияси номаълум. Бундан ташқари, заводларга пахта ўтказилади, қандай навни ўтказаётганини фермерларнинг ўзлари баъзан билишмайди, натижада, олинган чигит қайси навники эканини ҳам аниқлаш мумкин бўлмай қолади. Ваҳоланки, собиқ Иттифоқ даврида бундай камчиликка умуман йўл қўйилмаган. Минтақада экилган навлар назорат қилиниб, ҳар бирини алоҳида қабул қиладиган қабул пунктлари бўлган. Ҳозир қайси хўжалик қайси навни экаётганини аниқлаш осон эмас. Чунки, назорат суст. Аслида бу иш билан қишлоқ хўжалик бўлимларида ишлаётган уруғ нозирлари шуғулланиши керак.
Бир-неча йил муқаддам бир деҳқон қўшни республикадан Қозоғистонга буғдой уруғи олиб келаётганида чегарачилар ўтказишмаган эди. Деҳқоннинг арзи кўрилиб, чегарачилар ҳақ бўлиб чиқишди. Чунки, олиб келинаётган ғаллада қишлоқ хўжалик экинлари касаллиги бўлиши мумкин экан. Вилоятимиз тарихида шундай воқеа бўлган. Кимдир Арабистондан ярим қоп буғдой олиб келиб, эккан. Ундаги касаллик вилоят хўжаликларининг ярмига тарқалган. Ҳозир эса чигитни Хитойдан олиб келиб экаётган деҳқон хўжаликлари бор. Уруғни ҳеч ким текширмайди, таваккалчилик.
Албатта, пахтачиликнинг ўзига яраша машаққати бор. Бир йиллари қиш эрта келиб, деҳқонлар ерни ҳайдашга улгуришмади. Баҳорда эса ёмғир ёғиш ўрнига ўттиз даражали иссиқ ва шамол туфайли ердаги намнинг борини қуритиб юборди. Мақтаарал туманига Ўзбекистондан оқиб келаётган Дўстлик каналида сув жилдираб турди. Деҳқонлар ҳеч бўлмаса насослар ёрдамида сувни кўтариб оламиз, дея кечаю-кундуз ухламай, сувнинг келишини пойлашди, аммо кўпчилик сувга етиша олмади. Бир йили эса, экинни вайрон қилувчи жала ва бедана тухумидек дўл ёғди. Кутилмаган табиий офат деярли 30 минг гектар ердаги ғўзани йўқ қилди. Хўжаликлар қайта чигит экиб, миллионлаб зарар кўрди. Қайта экилган майдонда ҳосилдорлик деярли икки баравар камаяди. Бундай зарарнинг олдини олиш мақсадида Жанубий Қозоғистон вилоят гидрогеолого-мелиоратив экспедицияси раҳбари, қишлоқ хўжалик фанлари номзоди Карл Анзельм 2000 йилларда янги технологияни ишлаб чиққан эди. У ғўзани кўчат усулида экишни тавсия қилган эди, лекин, ҳамкасблари томонидан қўллов топмади. Шунга қарамай, баъзи хўжаликларда бу усул қўлланилмоқда.
Вилоятнинг бир ҳокими пахта майдонларини қисқартиришни таклиф қилган бўлса, бошқаси кенгайтириш таклифи билан чиққанига гувоҳмиз.
Мустақилликнинг илк йилларида вилоятимиз қишлоқ хўжалиги мутасаддилари олдига экспортга яроқли маҳсулот етиштириш вазифаси кўндаланг қўйилди. Мева-сабзавот, ғалла ва ҳатто гўшт маҳсулотлари сифатининг пастлиги, кам миқдори ва сотув инфратузилмаларининг йўқлиги туфайли улар халқаро бозорга йўл топа олмади. Кондицияси паст бўлишига қарамай, пахтага талаб, эҳтиёж барқарорлигича қолгач, аввал Мақтаарал туманида турли фирмаларининг вакиллари баҳорги дала ишларини ўтказиш учун деҳқонларга олдиндан пул бера бошладилар. Пахта теримидан кейин эса қолган пахтани ҳам нақд пулга олиб кета бошлашди. Статистика маълумотларига кўра 1995 йилда вилоятимизда ғўза етиштириш учун 109,6 минг гектар ер ажратилган бўлса, 2004 йилга келиб бу кўрсаткич 224 минг гектарга етди, бу икки баравардан кўп. Фойда кетидан қувган пахтакорлар алмашлаб экиш ва бошқа агротехник тадбирларсиз пахта ернинг кучини олиб қўйишини унутиб қўйдилар. Натижада, ҳосилдорлик 25-28 центнердан 19-20 центнергача тушиб, етиштирилаётган пахтанинг сифати ҳам пасайиб кетди. Яъни, пахта толасининг ўртача миқдори ҳам уч фоизга пасайди. Қишлоқ хўжалигига ажратилаётган субсидияни олиш қийинлашгани боис, тарқоқ деҳқон хўжаликлари бирлаштирила бошланди. Бундан ташқари, давлат сувга бериладиган субсидияга янгича талаблар қўйди: эскича услубда, сувни жўяк орқали оқизиб суғорадиган деҳқонларга харажатларнинг 10 фоизи қопланса, томчилатиб суғорадиган деҳқонлар учун харажатларнинг 80 фоизи қопланмоқда. Далаларни зараркунандалардан тозалаш – давлат зиммасида. Лекин давлат ёрдами етарли бўлмаяпти. Катта майдонларда ғўза турли касалликларга чалиниб, оқибатда пахта хомашёсининг сифати пасаймоқда.
Пахтачилик стратегик хомашё сифатида давлат томонидан қўллаб-қувватланмоқда. Чунончи, Қозоғистон қишлоқ хўжалиги вазирлигининг Тараққиёт ва тикланиш халқаро банкининг молиявий кўмаги орқали Мақтаарал туманида экинларнинг сув таъминотини яхшилаш бўйича катта ишлар амалга оширилди. 1200тадан зиёд гидротехникавий иншоотлар қурилиб, 92 чақирим электр тармоқлари тортилди. Иншоотлар сув фойдаланувчиларининг “Береке” ва “Тоза сув” истеъмолчи ширкатларининг тасарруфига ўтказилди. Лекин деҳқонлар гидротехникавий иншоотлардан фойдаланишга пул топа олмадилар. Фойдаланилмай ётган қиматбаҳо ускуналарнинг ярмидан кўпи ўғирланди. Хўжалик раҳбарлари полицияга мурожаат қилишди, аммо трансформаторлар топилмади. Бунинг сабаби – пахтакорларнинг тарқоқлигида. Акс ҳолда гидроиншоотларнинг ўғирланишига йўл қўйилмаган бўларди. Ўғриларни деҳқонларнинг бири бўлмаса, бири кўрарди. Шу ўринда ўтган асрнинг 80 йилларида юз берган воқеа ёдимга тушди. Таҳририят топшириғи билан бир хўжаликка кетаётган эдик, узоқдан буғдойзор ёнаётганини кўриб қолдик. Шу жойга етиб бордик. Экин майдони катта ариқнинг икки томонида жойлашган экан. Бир томони ёняпти, иккинчи томонида одамлар юришибди.
– Ўт ўчирувчиларга хабар бердингларми? – сўрадик биз.
– Нега хабар берар эканмиз, – жавоб берди ёш йигит. – Ахир бу ғалла бизнинг бригаданики эмаску.
Мақтааралда ҳам гидроускуналар ўғирланаётганини кимдир кўрган бўлса ҳам, полицияга хабар бермаган бўлиши мумкин.
– Демак, ҳозир қишлоқ хўжалик институтлари селекционерлар тайёрлашни тўхтатишган. Бунинг ўрнига кенг профилли агрономлар тайёрламоқда, шундайми? – сўраймиз Б. Мирзабековдан.
– Худди шундай. Селекционерлар фақат собиқ иттифоқ даврида тайёрланарди. Бундан ташқари, уларнинг ихтиролари самара берса, йирик миқдорда рағбатлантирувчи мукофот бериларди. Чунки, янги нав яратиш учун зироатшуноснинг ўн йиллаб вақти кетарди. Нав самара берсагина рағбатлантириларди. Шунинг учун ҳар ким ҳам бу ишнинг бошини тутишга рози бўлавермасди.
Бир воқеани айтиб берай. Бир куни Сариоғоч туманидаги Телман номли жамоа хўжалигига ҚР Комфирқаси биринчи котиби Динмухаммед Қўнаев келди. Уни “красноводопадская 210” навли буғдой етиштирилаётган далага олиб бордик. Йирик бошоқлар доннинг оғирлигидан эгилиб турарди. Қўнаев нав муаллифи билан қизиқди. Биз Андрей Фёдорович Марко эканини айтиб, кўп ўтмай, партия раҳбари билан уни юзлаштирдик. Андрей Фёдорович меҳнатининг юксак баҳоланганидан кўзига ёш олди.
Динмухаммед Ахмедули Маркога 20 минг сўм мукофот пули беришни топширди. Бу шу давр учун катта маблағ эди. Жанубда ўнлаб таниқли селекционерлар етишиб чиққан. Шулардан бири – арпанинг тўрт нави, шу жумладан, “байшешек”нинг муаллифи оддий агроном Садирбай Байтуғанов. Бу навга ҳозир ҳам Ўрта Осиё давлатларида талаб катта. Агроном ҳатто номзодлик диссертациясини ҳам ёзмаган, лекин яратган янги нави учун унга олимлик даражаси берилган. Элбоши ўз мактубларида рақобатбардош бўлиш, рақобатбардош ва экспортбоп маҳсулотлар етиштириш, шунинг натижасида 30та ривожланган мамлакат қаторига кириш вазифасини юклади. Қишлоқ хўжалик экинлари ҳосилдорлиги ва сифатини орттириш учун эса кўп ҳолларда илм-фанга, янги, замонавий технологияларни қўллай олишга боғлиқ.
Мирзабаев билан суҳбатлашиб бўлгач, Карл Анзельмдан ғўзани кўчат усулида етиштириш ҳақида батафсил гапириб беришини илтимос қилдим.
– Балки, сиз ихтиро қилган усул ер майдони унча катта бўлмаган деҳқонларни қизиқтириб қолар? – сўрадим ундан.
– Мен бу усулнинг муаллифи эмасман. Биз фақат Сариоғоч туманидаги хўжаликларда тажриба ўтказдик, холос. Унда Бўлат Мирзабекули ҳам иштирок этди. Бу усулни хитойлик пахтакорлар кўп йиллардан бери қўллаб келишмоқда. Чигит аввал турли органик ўғитлар, пахта тозалаш заводлари чиқиндилари ва тупроқ билан тўлдирилган тувакчаларга экилади. Улардаги ўғит бир томондан тупроқни озиқлантириб, бойитса, иккинчи томондан, кўчатларга куч бериб, турли касалликларга бардошли бўлишини таъминлайди. Даставвал, ўрта толали “С4727” навини иссиқхонадаги тувакчаларга экдик, 4-5-куни улар униб чиқди. Апрельнинг биринчи ўнкунлигида бўйи 15-20 сантиметрга етган кўчатларни далага экдик. Кузатувлар кўрсатдики, 40 кундан кейин ерга чигит ҳолида экилган ғўзалардан ўзиб кетди, бўйи баланд ва ҳосилдорлиги 20 фоиз юқори бўлди. Сентябрнинг биринчи ўнкунлигида машина теримига киришилди. Шу усулда ингичка толали пахта етиштириш ҳам мумкин. Иқлимнинг ўзгариши туфайли пахта етиштириш йилдан йилга қийинлашиб бораётгани сир эмас. Шунинг учун фақат янги нав излаш билан чегараланиб қолмасдан, янги, жадал технологияларни ҳам излаш мақсадга мувофиқ. Давлат миқёсида Ўзбекистон қишлоқ хўжалик олий ўқув юртлари билан алоқа ўрнатиб, селекционер мутахассисларни тайёрлаш, пахта кластерига асос солиш, қозоғистонлик пахтакорларнинг ўзбекистонлик ҳамкасблари билан учрашиб, тажриба алмашиши учун имконият яратиш масалалари ҳам долзарб.