Шимкентда “Миллион билан бирга шодланайлик!” флешмоби ўтди

Шимкентдаги “Наурыз” майдонида шаҳар аҳолиси ҳамда шаҳар раҳбари Нурлан Сауранбаевнинг ташаббуси билан “Миллион билан бирга шодланайлик!” флешмоби ўтди.

Миллионли шаҳарда бир лаҳза электр манбаини ўчириш орқали 1 млн. киловатт электр қуввати тежалди. Миллионли шаҳар мақомини олган Шимкентнинг байрамини нишонлашга йиғилган минглаб одамлар ўз тилакларини айтиб, ёритгичлар учиришди.

Кўпчилик кўтаринки кайфиятда мусиқа садоси остида рақсга тушиб, чўнтак ёритгичларини кўтариб, она юртига муҳаббатини изҳор қилди.

Сўнгги фонар учирилганда ёмғир томчилай бошлади. Шунга қарамай ёритгичлар Шимкент осмони ҳавосида анча вақтгача сузиб юрди. Чақаётган чақмоқ ҳам худди байрам дастурига киритилгандай вақти-вақти билан шаҳарни ёритиб турди.

– Бундай байрамлар мунтазам ўтказилиб туришини истардим, – деди тадбир иштирокчиси, Маданият ходими Салтанат Маралова.

– Гулларга бурканган Шимкентимизнинг миллионли шаҳарга айлангани қалбимизни завқ-шавққа тўлдирмоқда, – деди яна бир иштирокчи Азиз Умаров, – мана фаровон кунлар саодати, гуллар ҳидидан ёшларимизда бунёдкорлик иштиёқи ортмоқда. Бундай шодиёналар кўп бўлсин.

Таъкидлаш жоизки, бу флешмоб эко-акцияга уланиб кетди. Тадбир сўнггида иштирокчилар шаҳарни ахлатдан тозалашга киришиб кетишди.