Футболдан Қозоғистон премьер-лигасининг 13-турида “Ордабасы” “Ақтөбе” жамоасини қабул қилди. Ўз майдонида деб айтмаслигимизнинг сабаби бор. Қозоғистон футбол федерацияси Шимкентдаги Қажимуқан Мунайтпасов номидаги марказий стадионда тунги чироқлар йўқлиги туфайли бу ерда ўйин ўтказишга чек қўйган. Федерация раҳбарининг талаби ўринли. Бир неча йиллардан бери ҳал этилмаётган “прожекторлар” масаласи қачон ечимини топиши даргумон. Қисқаси, стадион УЕФА талабларига мос таъмирланади, деган ваъда бор.

Шундай қилиб, Тассайдаги “На­мыс” стадионида ўтган учрашувда шим­кентликлар жуда чиройли  ўйин­нинг гувоҳи бўлишди.  31-дақиқада Тунғишбаев жарима майдони таш­қарисидан зарб билан тепган тўп дарвоза тўрига тушди. Бундан руҳ­ланган Петрушиннинг шогирдлари 39-дақиқада ҳисобни оширди. Она заминдан руҳланган Нўсербаев жорий йил чемпионатининг бешинчи голини урди.

Иккинчи таймда иккала жамоа сафидаги ўйинчилар ҳам қизил кар­точ­ка олди. “Ордабасы” бир неча имкониятни қўлдан бой берса, қўшимча вақтда ақтўбеликлар 1 тўп билан жавоб қайтаришди. Хуллас, 2:1 ҳисобида ғалабага эришган “Ордабасы” тарихнинг янги саҳифасини очди. Сабаби, икки мингинчи йиллардан буён “Ордабасы” “Ақтөбе”ни бир йилда икки марта ютмаганди.

Турнирдан сўнг жамоамиз 26 очко билан жадвалнинг иккинчи поғонасидан жой олди. Сўнгги учрашувнинг бештасида ғалабани қўлга киритган шимкентлик клуб кеча Алматининг “Қайрат” жамоасини қабул қилди.