Ҳурматли жанубийқозоғистонликлар!

Рамазон ҳайити байрамига омон-эсон етказган Аллоҳ таолога беадад шукрлар ҳамда ҳамдлар бўлсин! Барча ҳамюртларимни мусулмонларнинг муқаддас байрами – Рамазон ҳайити бошланиши билан муборакбод этаман. Ҳайитингиз муборак бўлсин!

Муборак Рамазон ойининг тугашини англатадиган ушбу ҳайит байрами –мурувват, эзгулик, шукроналик, бирлик, саховат, дўстлик ҳамда шодлик байрамидир. Ҳайит миллатлар ва элатлар тотувлигини мустаҳкамлаб, хушфеъл, меҳмондўст халқимизни хайрли ва эзгу ишларни амалга оширишга чорлайди. 

Бир ой давомида халқимиз сабр-тоқат билан рўза тутди. Масжидларимизда ифторлик ва хайрия тадбирлари уюштирилиб, кам таъминланган оилаларга ёрдам берилди. Аллоҳ улардан рози бўлсин! 

Яратувчи ҳар бир эзгу амалнинг савобини бериб, раҳматига муяссар қилсин. Ҳайит куни ғусл қилиниб, ифорли атирлар сепиб, жамоат билан ҳайит намозида иштирок этишнинг савоби катта. Қариндош-уруғларни, дўсту ёрларни муборак кун билан қутлаб, байрам дастурхонини тузаш – Ҳайит байрамининг кўрки ва улуғворлигини англатади. Бу кунда аразлашганлар ярашиб, ўзгаларнинг хато-камчиликларини кечириб, ота-онамизнинг ҳурмати ва розилигига эришадиган кун. 

Исломда ҳар бир эзгу амал – садақа. Қўшнига ёрдам қўлини бериш, муҳтожга ёрдамлашиш, етимларга раҳмли бўлиш, ўзгаларга қувонч баҳам кўриш, бу ҳам – садақадир.

Ҳайит оиламизни қувончга тўлдирсин. Аллоҳ таоло рўзаларимизни, дуо-тилакларимизни қабул қилсин! Халқимизнинг бирлиги ва тотувлиги ортиб, Мустақиллигимиз таянчи мустаҳкамланаверсин!