Кеча тиббиёт ходимлари куни арафасида вилоят ҳокимлиги биноси олдидаги майдонда минтақа раҳбари Жансейит Туймебаев улар1ни касбий байрами билан табриклади.

– Инсон ҳаётининг ҳимоячиси бўлган шифокорларнинг жамиятдаги ўрни муҳим. Вилоят соғликни сақлаш соҳасида ҳозирги кунда 7 мингдан зиёд шифокор ва 25 минг ҳамшира меҳнат қилади, – деди Жансейит Қансейитули. – Тиббиёт соҳаси – давлат сиёсатининг асосий йўналишларидан бири. 

Шу боис, вилоятимизда ушбу соҳага ажратиладиган маблағ йилдан-йилга ортиб бормоқда. Натижада, тиббиёт муассасаларимиз энг замонавий асбоб-ускуналар билан жиҳозланиб, даволашнинг самарали усуллари қўлламоқда.

Сўнг вилоят ҳокими минтақадаги касалхона ва шифохоналарга 27та “Тез ёрдам” машиналарининг калитини топширди. Янги автомашина беморга дастлабки тиббий ёрдам кўрсатишга мўлжалланган зарур ускуналар билан жиҳозланган. Таъкидлаш жоизки, биринчи тиббий ёрдам хизматининг санитария автопаркини янгилаш ишлари тизимли равишда олиб борилмоқда.

Вилоят соғликни сақлаш бошқармаси раҳбари Муқан Егизбаев даволаш муассасаларини санитария автомашиналари билан таъминлаш йил охиригача давом этишини таъкидлади. Айниқса, аҳолиси тиғиз жойлашган, техника танқис, йирик йўллар бўйида жойлашган Сариоғоч, Абай, Жетисай, Мақтаарал, Ўрдабоши каби туманларга устуворлик берилишини таъкидлади.

Тиббиёт ходимларининг касбий байрами Тулкибош туманидаги “Ақ шатыр” дам олиш марказида давом этди. Минтақамиздаги соғликни сақлаш соҳасининг бир гуруҳ ходимлари тақдирланиб, тадбир сўнгги концерт дастурига уланиб кетди.