Жанубий Қозоғистон вилояти ҳокими Ж. Туймебаев “Ҳоким соати” кўрсатувида икки соатдан зиёд вақт мобайнида фуқароларни ташвишлантираётган саволларга жавоб берди.

«Оңтустік» телеканалида ўтган бевосита эфирга жами 1500га яқин савол келиб тушди. Саволлар Call-марказ, WhatsApp тармоғи, электрон почта, шунингдек, бевосита кўрсатув олиб борилган Жанубий Қозоғистон вилоят ҳокимлигининг фейсбукдаги расмий саҳифасига ҳам келиб тушди.

Жанубийқозоғистонликлар ер, бошпана, ишсизлик, шаҳарни ободонлаштириш, уй-жой коммунал хўжалиги ва йўлларни таъмирлашга оид масалаларни кўтарди. Шунингдек, қишлоқ хўжалигига тегишли саволлар ҳам кўплаб йўлланди.

Саволларнинг 423таси WhatsApp тармоғи орқали тушган. Бошқа ижтимоий тармоқлардан 215та, Call-марказга 1287 киши телефон орқали савол йўллаган.

Таъкидлаш жоизки, «Оңтустік» телеканали ўтказган бевосита мулоқот давомида жавоб ололмаган томошабинларнинг саволлари рўйхатга олиниб, уларга албатта, мутасадди давлат органлари жавоб берадиган бўлди. Шунингдек, ушбу лойиҳа доирасидаги вилоят ҳокими Жансейит Туймебаев топшириқларининг ижроси ҳокимликдаги инспекторларнинг диққат-эътиборида бўлади.

Элбоши Нурсултан Назарбаевнинг «Бешта ижтимоий ташаббус» дастурининг минтақадаги ижроси ва вилоятнинг ижтимоий-иқтисодий тараққиёти, таълим ва фан, маданият, санъат ҳамда бошқа соҳаларда учрайдиган муҳим ва долзарб муаммоли масалаларни ҳал қилиш йўлларини гапириб берган минтақа раҳбари дастур якунида вилоят аҳлини Рамазон ҳайити билан табриклади.