Шимкент шаҳрида “Астананинг 20 йиллигига – 20 иншоот” акцияси доирасида “Астана” кичик тумани ва “Астана” хиёбони очилди.

Вилоят маъмурий-тадбиркорлик маркази ҳудудида жойлашган ушбу кичик тумандан шаҳарликларга янги уйлар топшириш тадбирида иштирок этган вилоят ҳокими Жансейит Туймебаев ва шаҳар ҳокими Нурлан Сауранбаев барчани қувончли лаҳзалар билан қутлади.

– Шимкент – элимизда Астана ва Алмати шаҳарларидан кейинги энг йирик шаҳар. Бугун шаҳар чиройига янада кўрк қўшадиган “Астана” хиёбони халқимиз эзгулигига хизмат қилади. Шунингдек, пойтахт юбилейи арафасида шаҳарликларга янги квартира калитини топширяпмиз. Ушбу муваффақиятларга эришишимиз мустақиллик ва Элбошимизнинг доно сиёсати туфайлидир. Барчага соғлик, хонадонларингизга қут-барака тилайман!, – деди Жансейит Қансейитули.

“Нурли ер” дастури доирасида қад ростлаган бу уйлар ижтимоий кам таъминланган оилалар, етимлар ҳамда уй навбатида турган фуқароларга берилди. Бугунги кунда 90 минг квадрат метр майдонда 27та уй қурилмоқда. Энди бу кичик туман “Астана” деб номланади.

Майдони бир гектардан зиёд хиёбонга эса чинор, қайин дарахтлари ҳамда турли-туман гул кўчатлари ўтқазилиб, ўриндиқлар ўрнатилган. Келгусида шаҳарни ободонлаштириш ва кўкаламзорлаштириш ишлари давом этаверади.