Қозоғистон ва Ўзбекистон Республикалари Бош прокуратуралари вакиллари Шимкент шаҳрида икки томонлама ҳамкорлик учрашувини ўтказдилар. Унда Қозоғистон томонидан Бош прокурорнинг биринчи ўринбосари Ғ. Нурдаулетов, Бош транспорт прокурори, Ақтўбе, Манғистов, Қизилўрда, Жанубий Қозоғистон вилоятлари прокурорлари иштирок этишди.

Ўзбекистон Республикаси Бош прокурори ўринбосари Э. Йўлдошев раҳбарлигидаги делегация таркибида Тошкент, Сирдарё, Жиззах, Навоий вилоятларининг прокурорлари бор эди.

Учрашувда меҳнатга ноқонуний жалб этиш, жиноий қидирув доирасида халқаро талабларни бажариш, судланган Ўзбекистон Республикаси фуқароларини депортация қилиш, шунингдек, чегарадаги ўтказиш-назорат бекатларида автотранспорт ўтиш йўлакларини ташкил қилиш масалалари муҳокама қилинди.

Мажлис иштирокчилари чегаравий алоқа, Қозоғистон ва Ўзбекистон прокуратураларининг ўзаро иш юритиши икки томонлама келишувни янада такомиллаштиришга имконият яратишини таъкидладилар.

Учрашув сўнггида икки мамлакатнинг Бош прокуратура вакиллари меҳнатга ноқонуний жалб этиш, судланганларни топшириш, жиноий-ҳуқуқий соҳадаги халқаро талаблар ижросига йўналтирилган қатор ҳужжатларни имзоладилар.