Туркистон вилояти маркази – Туркистонга шаҳар тозалиги учун олинган янги техника берилди. Шаҳар ҳокими А. Ўсербаев мазкур автотранспорт калитларини тантанали равишда топширди.

Замонавий янги техника бир вақтнинг ўзида бир неча ишни бажаришга қодир. Масалан, сув сепиш ускунасига эга автомашина ёз мавсумида кўчаларга сув сепиб, супурса, қишда муз ва қорни эритиб, тозалашни ҳам эплайди. Топширилган 8та техника воситаси умумий қиймати 189 млн. 165 минг тенге.

Қадим Туркистон шаҳри – вилоят маркази мақомини олганини таъкидлаган шаҳар раҳбари асосий вазифа – шаҳар тозалиги эканлигини таъкидлади.

 Бугунги кунда Туркистон шаҳри аввалги туман миқёсидаги шаҳар эмас, вилоят марказига айланган шаҳар бўлди. Ушбу йўналишда бизу сизга юкланган вазифа ва талаб жуда юқори. Туркистон учун ҳозирги кунда энг муҳим масала шаҳар озодалиги, кўкаламзорлаштириш. Тозалаш ишларини жонлантириш учун унга керакли техниканинг сонини кўпайтириш асосий юмушларимиздан бири, – деди А. Ўсербаев.

Шунингдек, шаҳар ҳокими Туркистоннинг замон талабига мувофиқ ривожланиш суръатини янада ошириш учун зарур йўналишларни такомиллаштириш ҳамда шаҳарнинг логистика имкониятларини ошириш, сайёҳлик маркази сифатида ривожлантириш бўйича аниқ тадбирларни доимий эътиборда тутишини ҳамда келгусида зиммага юкланган талаб ўта кучли бўлишини таъкидлади.