Давлат раҳбари Нурсултан Назарбаев касбий боксдан жаҳон чемпиони Геннадий Головкинни қабул қилди

Учрашувда Президент WBC, WBA (Super), IBO ва IBF тоифалари бўйича боксдан жаҳон чемпиони Геннадий Головкинга миннатдорчилик билдириб, қозоғистонликлар унинг касбий спортдаги ёрқин муваффақиятлари билан фахрланишини айтди.

– Ватандошларимиз сенинг яккама-якка олишувингни диққат биланназорат қилиб боришади. Сен доимо Қозоғистонни шарафлаб, ўз она-юртингни ҳеч қачон унутмай, барча мамлакатларда уни кўкка кўтариб юрасан. Биз сен билан фахрланамиз. Сентябрда сени ўта муҳим яккама-якка жанг кутмоқда. Барча қозоғистонликлар номидан сенга омад тилайман, – деди Қозоғистон Президенти.

Нурсултан Назарбаев Геннадий Головкиннинг Қозоғистон спортини оммалаштиришда ва элимизнинг халқаро нуфузини оширишдаги ролини таъкидлаб ўтди.

Г. Головкин шахсан қўллов кўрсатаётгани ва Қозоғистон бокс мактабини ривожлантиришга катта эътибор қаратаётгани учун Н. Назарбаевга миннатдорчилик билдирди.

– Мен бундан буён ҳам элимизни халқаро ареналарда танитиш учун бор куч-ғайратимни сарфлайман. Агар ҳаммаси ўйлаганимдай бўлса, Қозоғистонда якка кураш ўтказиш режамиз ҳам бор. Халқимиз мана шундай қизиқарли ўйинларни томоша қилишга муносиб, деб ҳисоблайман. Аҳамияти зўр бундай яккакурашни барчанинг кўргиси келади, менимча, – деди Г. Головкин.

Шунингдек, боксчи Қозоғистон Президентига WBC, WBA (Super), IBO ва IBF тоифалари бўйича касбий боксчилардан ютиб олган чемпионлик камарларини совға қилди. 

Учрашув ниҳоясида Н. Назарбаев Г. Головкинни “Қозоғистон Республикасининг Тўнғич Президенти – Элбоши Нурсултан Назарбаев” ордени билан мукофотлади.