Туркистоннинг Қорачиқ қишлоғида туғилиб-ўсиб, олий маълумотли муҳандис ихтисосини эгаллаганимда вақти келиб, Қозоғистондек бепоён ва кўп миллатли давлатни оқилона бошқариб келаётган муҳтарам Президентимиз Нурсултан Назарбаевнинг мен бунёд этган «Турон» корхонасига келиб, маҳсулотларимиз билан танишиш, дастхат ёзиб қолдиришини тасаввур ҳам қилмаганман. Бу – умримдаги энг шарафли ва эсда қоларли воқеа бўлди. 

2000 йили вилоят ҳокими Б. Сапарбаев, шаҳар ҳокими Ў. Аметули билан бирга Туркистонга ташрифи чоғида давлатимиз раҳбари бизнинг корхонани ҳам келиб кўрадиган бўлди. 

Қишлоқ округи ҳокими Зоид Маменов ва мен, ҳамкасбларим, барчамиз ҳаяжондамиз. Элбоши корхонамиз олдида автомашинадан тушгач, очиқ юз билан биз билан саломлашди. Мен корхонанинг тарихи, бугуни ва истиқболи ҳақида гапириб бердим. Гапларимни диққат билан тинглади. Кўргазмага ўзимизда ишлаб чиқарилган маҳсулот турлари қўйилганди. Уларни ҳам синчковлик билан кўздан кечирди. Менинг сезганим, Элбоши ўзининг қишлоқ хўжалиги соҳасидаги пахта кластери сиёсатининг корхонамиз мисолида самарали амалга ошганидан беҳад мамнун эди. Корхонамизда ўзимиз эккан пахта толасидан ип, ипдан тўқилган газламага «Зор табыс тілеймін» деб, дастхат ёзиб берди. Бу матони биз корхонамизнинг шонли тарихи сифатида сақлаб қўйганмиз. Элбошимизнинг шу тилаги вожиб бўлиб, корхонамиз кенгайди, янги маҳсулотлар ишлаб чиқара бошладик. Сутни қайта ишлаш корхонасини ишга туширдик. Уруғчилик хўжалигини ташкил этганмиз. Хуллас, иш ва режаларимиз бисёр. Давлатимиз раҳбарининг қишлоқ хўжалиги соҳасидаги сиёсатини амалга ошириш борасида келажакда ҳам самарали меҳнат қилаверамиз.