Мустақилликнинг дастлабки йили Элбошимизнинг муҳтарам Фармони билан Туркистонда мисли кўрилмаган янгилик – А. Яссавий номидаги олий ўқув юрти бунёд этиладиган бўлди. Биров бунга ишонди, биров йўқ. Лекин, мана 27 йилдирки, бу Фармоннинг ҳаётийлиги, тўғрилиги ва Туркистон учун муҳимлигини ҳаётнинг ўзи исботлаб берди. Туркистондаги университет бир неча йилдан сўнг халқаро мақомга эга бўлиб, Халқаро қозоқ-турк университети деб аталди. Жаҳоннинг ўнлаб давлатларидан келган юзлаб талабалар бу ерда турли ихтисослар бўйича олий таълим олишмоқда. Халқаро университет қошида бунёд этилган замонавий клиника эса шаҳар аҳолисига самарали тиббий хизмат кўрсатмоқда. 

Мен олий тоифали кўз шифокори сифатида шу клиникада меҳнат қилиб, юртдошларимиз соғлом бўлсин деб, тер тўкмоқдаман. Элбошимизнинг Туркистонда университет очиш тўғрисидаги Фармони натижасида минглаб ёшлар олий таълим олиш бахтига, клиникамизда эса юзлаб беморларнинг дарддан фориғ бўлиб, соғлом ҳаёт кечиришига шароит яратилди. Бу неъматларнинг қадрига етиш, шукрона айтиш бизнинг фуқаролик бурчимиздир.