Туркистон вилоятининг Тўлебий туманига янги ҳоким тайинланди. ҚР Президенти Маъмурияти ва туман маслаҳатининг розилиги бўйича вилоят ҳокими Жансейит Туймебаев ушбу лавозимга Бауржан Ўмарбековни тайинлади. 

Ҳокимни туман фаолларига таништирган минтақа раҳбари Давлат дастурларини сифатли амалга оширишга, туманнинг ижтимоий-иқтисодий ривожланишини, аҳолининг, шу жумладан, ёшларнинг бандлигини диққат марказда тутиш зарурлигини айтди. Шунингдек, туман тараққиётига ўз ҳиссасини қўшган собиқ ҳоким Бухарбай Пармановга миннатдорчилик билдириб, келгуси ишларида омад тилади.

– Туманда бошпана билан таъминлаш, қишлоқ хўжалиги ва сайёҳликни ривожлантириш бўйича кенг қамровли ишлар юритилмоқда. Янги ҳоким ана шу ишларни тезлаштириб, сифатли амалга ошириши зарур. Барча соҳани рақамлаштириш ҳам унинг эътиборида бўлмоғи лозим. Шунингдек, аҳолини тоза ичимли сув ва табиий газ билан таъминлашни топшираман, – деди ҳоким.

Б. Ўмарбеков 1983 йилда туғилган, олий маълумотли, иқтисодчи ихтисослигига эга. Меҳнат фаолиятини 2005 йили “Қазкоммерцбанк” ҲЖнинг Шимкент филиали бизнесни ривожлантириш шўъбасининг мижозлар билан иш юритиш менежери сифатида бошлаган. 2006-2015 йиллари банкнинг Шимкент шаҳридаги 814-сонли операция бўлими менежери, “Банк Туран Алем” ҲЖ вилоят филиали насия тизими шўъбаси мудири, “Альянс Банк” ҲЖ директорининг кичик бизнес бўйича ўринбосари, “Тадбиркорларга хизмат кўрсатиш маркази” МЧБ директори вазифаларини бажарди.

2015-2016 йиллари Жанубий Қозоғистон вилоят тадбиркорлик, идустриявий-инновациявий ривожланиш ва туризм бошқармаси раҳбарининг ўринбосари, вилоят ҳокимининг маслаҳатчиси бўлди. 2016 йилнинг июль ойидан Ўрдабоши тумани ҳокимининг ўринбосари лавозимида фаолият юритди.