Астана шаҳрининг 20 йиллиги кенг миқёсда нишонланмоқда. Ушбу байрам арафасида Қозоғистон ўзбек этномаданият бирлашмалари «Дўстлик» ҳамжамияти пойтахт аҳлига 20 қозонда 20 килограммдан ўзбек паловини тақдим этишга қарор қилганди. 

Барча вилоятлар, Астана, Шимкент, Алмати шаҳар этномаданият бирлашмаларининг шижоати туфайли бу тадбир тўла-тўкис амалга оширилди. Бош шаҳримизнинг «Талабалар истироҳат боғи»да йиғилган аҳоли ўзбек миллий таомини тановул қилиш билан бир вақтда «Ғунча», «Пойтахт», «Жозиба» ва бошқа санъаткорлар гуруҳлари ижросидаги ўзбек куй-қўшиқларидан ҳам баҳраманд бўлди. Меҳрибонлик уйларига, шифохоналарга, етим-есирларга мамлакатимизнинг энг уста ошпазлари дамлаган ош тарқатилди. Шу куни дунёга келган 20та чақалоққа совға – ўзбек миллий либослари тақдим этилди. 

Алмати, Шимкент, Кентов, Туркистон шаҳарлари, Жамбил, Туркистон, Қизилўрда, Атирау, Ақмўла, Қўстанай вилоятлари, Сайрам, Тўлебий туманлари вакилларига алоҳида миннатдорчилик билдирилди. Тадбирнинг муваффақиятида Икромжон Ҳошимжонов, Шерзод Пўлатов, Баҳром Мўминов ва бошқа раҳбарлар, Хонимбуви Мираҳмад қизи, Ирисдавлат Қурбонов сингари фаолларнинг салмоқли улуши бор. Байрам дастурхонига ҳамма имкониятига кўра улуш қўшди, ниятига кўра ажрини олишига ишонамиз.