Турон. Туркистон. Ватан. Кўз ўнгимизда туркийларнинг қадимиятдан Она Ери, Турк дунёсининг тарихий Ватани – салобатли жуғрофий ҳудуд намоён бўлади. Туркистон ғояси халқларимизнинг азалий муқаддас орзуси, миллий мафкурасидир.
Боймирза ҲАЙИТ, шоир.
Бизнинг авлод шўро тизими даврида туғилиб, вояга етди. Шу давр мафкурасига кўра, мактабда пионер, комсомол сафига кирдик. Дунёдаги энг буюк мамлакат фарзанди эканлигимиздан фахрланиб юрдик.
Дадамиздан эрта айрилганимиз сабабли Бобур Мирзонинг ўз фарзанди – аржуманди Ҳумоюнга нисбатан кўрсатган чексиз меҳрини эслаб қўяман. Ота меҳрининг ўлчови ва чегараси йўқлигини дилдан ҳис қиламан. Ота авлодимиз тарихидан бехабар қолганимдан куйинаман.
Озгина улғайиб, эл таний бошлаганимда қулоғимга туркий атамалар чалиниб қолса, туркий халқлар тарихидан гап очилса, диққат билан қулоқ солардим, Туркистон шаҳри, Хожа Аҳмад Яссавий мақбараси кўз олдимга келиб, кўксимда қандайдир энтикиш пайдо бўларди. Туркистон тарихини мен барча туркий халқларнинг ота тарихига менгзайман. Шунинг учун вояга етгач, туркий халқлар тарихини чуқур ўрганишга жазм қилдим, илмий кутубхоналарга бориб, турли адабиётларни ўргандим.
Шунга амин бўлдимки, халқнинг давлатчилик тараққиёти, маънавий ва маданий қадриятлари қанчалик қадимий бўлса, унинг ахлоқи, урф-одатлари илдизи ҳам шунчалик чуқур бўларкан. Чунки ҳар қандай давлатчилик асослари ва қонунчилик тизими, буюк маънавият ва маданият, ҳар қандай ахлоқ, анъаналар жамият тараққиёти, ҳаётий тажрибалари асосида юзага келади ва энг мақбуллари авлоддан-авлодга ибрат сифатида қолдирилади.
Тадқиқотчиларнинг фикрига кўра «Авесто» Ўрта Осиёда, аниқроғи, Хоразмда милоддан аввалги 1-минг йилликнинг 1-ярмида вужудга келган. «Авесто»да келтирилган географик маълумотлар ҳам буни тасдиқлайди. У узоқ вақт мобайнида шаклланган. Китобда келтирилган маълумотларнинг энг қадимийлари милоддан аввалги 2-минг йиллик охири – 1-минг йиллик бошига оид бўлиб, оғзаки тарзда авлоддан-авлодга ўтиб келган. Кейинги асрларда «Авесто» таркибига турли диний урф-одатлар баёни, ахлоқий, ҳуқуқий қонун-қоидалар ва ҳоказолар қўшилиб борган.
Тарих фанлари доктори профессор Гога Ҳидоятовнинг “Турк цивилизацияси” китобида бу ҳақда аниқ маълумотлар берилган. Шуни ҳам таъкидлаш жоизки, ўзбеклар «Турк Дарахти»нинг катта бир шохи эканлигини ўтган аср 20-йилларнинг бошларида жадидлар айтган, шу боис Абдулҳамид Сулаймон Чўлпон, Маҳмудхўжа Беҳбудий, Мунаввар Қори, Мустафо Чўқай, Абдурауф Фитратлар рус мустамлакачилари томонидан “пантуркистлар”, дея аталиб, шунга яраша жазо олган эдилар.
Олтин Ўрда, Дашти-Қипчоқ Туркистон ўлкаси умуминсоният тараққиётининг йирик ўчоқларидан бири бўлганини исботлайди.
Бинобарин, Туркистон тарихининг «қаймоғи» ҳисобланган кушонлар, турк ҳоқонлиги, сомонийлар, қорахонийлар, Хоразмшоҳлар, Темур ва темурийлар давлатлари ҳақида бирорта йирик асарлар яратилмаганини таассуф билан таъкидлаш зарур.
Ҳозирда мустақилликка эришган Қозоғистоннинг халқаро алоқалари изчиллик билан ривожланмоқда. Шундай вазиятда уларнинг тарихий илдизларини билиш фойдадан холи эмас. Ўтмишда ҳам, ҳозирги замонда ҳам халқаро алоқалар ҳар бир мамлакат тарихининг таркибий қисми ҳисобланиб, уларсиз тарих ҳақида тўла тасаввур ҳосил қилиб бўлмаган. Хусусан, Қозоғистоннинг Россия, Хитой, Эрон, Туркия, Ҳиндистон ва Араб мамлакатлари билан кўп асрлик сиёсий, иқтисодий ва маданий алоқалари тарихини чуқур ўрганиб, йирик асарлар нашр этиш зарур, деб ҳисоблайман.
Жанубий Қозоғистон вилоят марказининг қадимий ва бой тарихга эга Туркистон шаҳрига кўчирилишини ўз вақтида амалга оширилган оламшумул воқеа деб баҳолайман. Элбоши таъкидлаганидай, бу минтақани иқтисодий-ижтимоий жиҳатдан юксалтирибгина қолмасдан, тарихий обидаларга бой шаҳар салоҳиятидан унумли фойдаланиш ва унинг имкониятларини кенгайтиришга кенг йўл очади.
Вилоят ҳокими Ж. Туймебаевнинг «Асосий мақсад – Туркистонни Шарқнинг тараққий этган шаҳарлари – Самарқанд, Бухоро, Хива сингари сайёҳларни энг кўп жалб қиладиган масканлардан бирига айлантиришдир», деган сўзларида ҳам чуқур маъно бор. Зеро, азалдан Қозоқ хонлиги маркази, бутун туркий оламнинг маънавий ўрдаси, маданий пойтахти бўлган қутлуғ маконнинг вилоят марказига айланишидан барча қозоғистонликлар манфаатдор. Давлатимиз раҳбарининг юртимиз мустақилликка эришган даврдан бошлаб Туркистоннинг нуфузини оширишга алоҳида эътибор қаратаётгани ҳам бежиз эмас.
Мухтасар қилиб айтганда, 1500 йилдан зиёд тарихга эга Туркистоннинг янада гуллаб-яшнашига хизмат қиладиган қарорни халқимиз қанчалик қувонч билан қарши олган бўлса, бу хабар ер юзидаги барча туркий халқларни ҳам хушнуд этиши шубҳасиз.