Бундан бироз илгари Шимкент шаҳри ҳудудининг кенгайиши сабабли 40та аҳоли манзилига 10та йўналиш бўйича қатнайдиган жамоат транспорти сонини кўпайтириш масаласи муҳокама қилинган, бунинг учун 100та автобус сотиб олиш зарурлиги ҳам айтилганди.

 Астана куни муносабати билан шаҳарга 30та янги автобус етказилиб, Ал Форобий майдонида уларнинг тақдимот маросими ўтди. Тантанали тадбирда шаҳар ҳокими Ғабидулла Абдирахимов келгусида “T-bus” МЧБ яна 70та автобус олиб келишини айтди. 

2017 йили шаҳар ҳокимлиги девони ва бўлим раҳбарлари бир ой давомида ишхоналарига жамоат транспортида қатнаб, ушбу соҳага тааллуқли қатор муаммолаларни аниқлашган эди. Шулардан бири – шаҳар четидаги кичик туманлар аҳолисини жамоат транспорти билан таъминлаш эди. Бугун мана, шаҳарга 30 автобус келтирилди.

Яқинда Шимкент шаҳрига республика аҳамиятига эга шаҳар мақоми берилганидан хабардормиз.

– Бу ерда жамоат транспортига қўйиладиган талаб ҳам кучайди. Шу боисдан янги транспортни шаҳар марказида юритиб, кичкина автобусларни аҳоли манзилларига юбормоқчимиз. Автопаркларни янгилаш ишларини ҳам йўлга қўямиз, – деди шаҳар ҳокими. 

Ҳақиқатан ҳам аҳоли манзилларига қатнайдиган автобуслар йўл ҳаражатларини тўлиқ қоплай олмаслиги аниқ. Шаҳар йўловчилар транспорти ҳамда автомобиль йўллари бўлимининг раҳбари Қуатжан Жуматаев шу сабабли уларга субсидия ажратиш режаланганини айтди. Ҳозирги кунда 26та транспорт компанияси бор. 70та йўналиш бўйича қатнайдиган 1100та жамоат транспорти йўловчиларга хизмат кўрсатмоқда.