Туркистон вилояти ҳокими Жансейит Туймебаев Ўтрор туманига хизмат сафари билан бориб, “Ўтрор тепа”да меъморлар, археологлар ва тарихчилар  билан учрашди. 

Туркистон шаҳри ривожланишига ҳисса қўшиш учун келган мутахассислар, мутасаддилар қола­­верса, ўз соҳасининг билимдонлари тўпланган Ўтрор қалъа­­­сидаги учрашувда минтақа раҳбари бир вақтлар қадим шаҳарда агломерация кучли бўлганини таъкидлади.

– Ўтрор қалъасига кела­ётганда бир неча тепалик бор. Уларнинг ҳар бирини ўр­га­ниш керак. Бир вақтлар Ўт­рор улкан шаҳар бўлиб, ат­ро­фидаги қишлоқлар унга хизмат қилган. Ма­салан, “Ол­тинтепа” деган жойда тан­галар, аёллар тақин­­­­­­­­чоқлари ишланган.  “Жаман тўбе” деган жой­да мол сўйилган, “Шақти тў­бе”да пичоқлар қайралган. Яъни, агломерация шу даврда ри­вожланган. Ҳозир қадимий қалъани ривожлантиришга ви­лоят хазинасидан маблағ аж­ратилмоқда. Сабаби, бу ерга келадиган туристларга қулай шароитлар яратиш керак. Бу ҳудуд келгусида очиқ осмон ос­тидаги музей кўринишига эга бўлиши керак, – деди Ж. Туймебаев.

Ишчи гуруҳи Ўтрор давлат археологик қўриқхона-музейига ташриф буюриб, экспозиция залини томоша қилди.

“Маданий мерос” ҳамда “Қа­димий Ўтрорни янгилаш” давлат дастурлари доирасида 2004-2007 йилларда Ўтрор қалъасидаги XIV асрга оид жума масжиди, XVI асрга оид бинолар, XI-XII асрларда қурилган иморатлар, марказий дарвоза ҳамда “Дарвазаи сўфи”, XIV аср ҳаммоми каби қатор ёдгорликлар ўрганилиб, уларни музейлаштириш бўйича кенг қамровли ишлар олиб борилган.

Бугунги кунда Ўтрор тума­нида 50 мингдан зиёд аҳоли бор. Қадимий қалъани  кўришга йилига ундан икки баравар кўп сайёҳ келади. Уларга қулай шароит яратиш мақсадида ту­ман бюджети ҳисобидан Арс­лонбоб мақбараси ва “Ўтрор тепа” қалъаси оралиғидаги 1,7 чақирим ерни ободонлаштириш лойиҳа-смета ҳужжатлари тай­ёр­ланиб, таҳлил натижалари олинди.