Қозоғистон халқи Ассамблеясининг “Маънавий янгиланиш” республика ёшлар ҳаракати “Буюк даштнинг муқаддас мероси” тарихий-экологик акциясининг учинчи мавсумини уюштирди.

Алмати вилоятида бошланган акция доирасида олимлар, турли этнос ёшларидан ташкил топган экспедиция аъзолари юртимиздаги тарихий-маданий ёдгорликлар билан танишиб, муқаддас жойларда тозалик ишларини олиб бормоқда. 

“Қозоғистон халқи Ассамблеяси” биносида ўтган тадбирда Жамбил вилояти делегацияси Туркистон вилояти “Ижтимоий тотувлик” ДКК ходимлари, этномаданият бирлашмалари вакиллари, “Маънавий янгиланиш” республика ёшлар ҳаракати минтақавий штабининг аъзолари иштирок этиб, эстафета вилоятимизга топширилди. 

Мажлисни Туркистон вилояти “Ижтимоий тотувлик” ДКК раҳбари Ербўл Байқўнақов очиб, лойиҳанинг аҳамиятига тўхталди.

– “Маънавий янгиланиш” дастури доирасида ўтаётган тадбир Қозоғистоннинг бой маданий мероси билан ёшларни таништириш учун катта имконият беради. Шу орқали ёш авлоднинг Ватанга муҳаббатини орттириб, элнинг бирлигини таъминлаш кўзда тутилган. Акция доирасида ташкиллаштирилган эко-шанбаликларда муқаддас қадамжоларни тозалайди, – деди Е. Сулейменули. 

Мажлисдан сўнг экспедиция аъзолари минтақамиздаги тарихий-маданий жойларга йўл олишди. Улар “Ўтрортепа” шаҳарчаси, Ўтрор давлат археологик қўриқхона-музейи, “Арслонбоб” мақбараси, Туркистондаги вилоят тарихий-маданий этнография маркази, “Ҳазрат Султон” давлат қўриқхона-музейига бориб, тарихий экспонатлар билан танишишди. 

Мамлакатимизнинг барча туманларида ўтаётган ушбу акция 15-18 август кунлари “Маънавий янгиланиш” республика ёшлар ҳаракати аъзолари иштирокида Алмати шаҳрида ниҳоясига етади.