ЖАНУБИЙ ҚОЗОҒИСТОН ВИЛОЯТИ ҲОКИМИ Ж. ТУЙМЕБАЕВ ШИМКЕНТ ШАҲРИДАГИ 1-СОНЛИ А. ПУШКИН НОМИДАГИ МАКТАБ-ГИМНАЗИЯДА ЎТГАН “СЎНГГИ ҚЎНҒИРОҚ” ТАНТАНАСИДА ИШТИРОК ЭТДИ.

Тадбирда сўз олган минтақа раҳбари барча жанубийқозоғистонлик битирувчиларни табриклаб, билимли, фаросатли ҳамда элимизнинг фахри бўлиб камол топишларини тилади.

– Сизлар Элбоши орзу қилган “Мангу Эл” ғоясининг бунёдкорлари эканингизни унутманг. Мактаб ва олий ўқув юртларида оладиган таълим-тарбия туфайли элимизнинг намунали фуқаролари бўлиб етишишингизга ишонаман. Қандай касб соҳиби бўлсангиз ҳам, муҳими, ўз элимизнинг ватанпарвари бўлишни ёддан чиқарманг. Вилоят таълим соҳаси 2016-2017 ўқув йилларида республика миқёсида юксак кўрсаткичларга эришди. Чунончи, ўқувчиларимиз республика олимпиадаларида 30та совринли ўрин ва 6 грантни қўлга киритди. Математика йўналиши бўйича “Энг яхши олимпиада жамоаси – 2017” унвонига эга бўлса, турли халқаро олимпиадалар ва илмий лойиҳа танловларида 50дан ортиқ совринли ўринларни эгаллади. Буларнинг барчаси устозлар тинимсиз ҳамда машаққатли меҳнатининг натижаси, деб биламан, – деди Ж. Туймебаев.

Умуман олганда, 25 май куни вилоятдаги 1028та мактабда “Сўнгги қўнғироқ” маросими ўтди. Жорий ўқув йилида минтақа мактабларида жами 611318 ўқувчи билим олса, шундан 33112 нафари мактаб билан хайрлашди. Битирувчиларнинг 1370 нафари “Олтин белги”га даъвогар бўлса, 863 ўқувчи умумий ўрта маълумот ҳақидаги имтиёзли аттестатдан умидвор. 

Жорий йили ЯМТ топширишга 23760 ўқувчи ариза берган. Бу битирувчиларнинг 71,8 фоизини ташкил қилади. Улар 29 май – 9 июнь оралиғида мактабда якуний аттестациядан ўтса, 20 июнь – 1 июль оралиғида ЯМТ топширади.

Собиржон ИСАМАТОВ тасвири.