Жорий йил август ойининг иккинчи якшанбасида нишонланган Қурувчилар кунида ажойиб инсон, собиқ ихтирочи-қурувчи, кўп қиррали ижодкор, таҳририятимизнинг ардоқли ходими, журналист Ҳайитмат Муҳиддиновга Туркистон вилояти ҳокими Жансейит Туймебаев “Вилоятга кўрсатган хизмати учун” медалини топширди. Бундан барчамиз қувондик. 

Ҳайитмат Муҳиддинов 1966 йили Шимкентдаги Кимё-технология институтини тамомлагач, меҳнат фаолиятини “Йирик панелли уй қурилиш комбинати”да усталикдан бошлаб, смена муҳандиси, катта муҳандис, муҳандис-лаборант, муҳандис-конструктор лавозимларида ҳормай-толмай меҳнат қилди. 

Шаҳримиздаги катта қурилишлар, шу жумладан, “Шимкент” меҳмонхонаси, темир йўл вокзалидаги 12 қаватли учта уй ва бошқа кўпгина иморатлар қад ростлашида муносиб ҳиссаси бор.

Унинг фидокорона меҳнатлари қурилиш трести, шаҳар, вилоят ва республика раҳбариятлари томонидан тақдирланган.

Ҳ. Муҳиддинов айни пайтда “Жанубий Қозоғистон” вилоят ижтимоий-сиёсий газетасида фаолият юритмоқда. Унинг “Боболар руҳига таъзим”, “Тарих гувоҳ жасоратлар”, “Элнинг Элбошига ихлоси баланд”, “Қозоғистоннинг билимли ёшлари – Элбошимиз эътиборида”, “Забардаст олим, довюрак ва ватанпарвар давлат арбоби”, “Дунёни тебрантирган аёл” каби мақолалари муштарийлар қалбидан ўрин олган.

Фурсатдан фойдаланиб, қурувчи-муҳандис, журналист, меҳнат фахрийси Ҳайитмат Муҳиддиновни Қурувчилар куни билан яна бир бор муборакбод этиб, оиласига осойишталик, тан-соғлик ва келгуси ишларида омад тилаб қоламиз.