Ундан ортиқ оғирлик юклатилса, мактаб раҳбари устидан шикоят қилиш, мумкин, дея хабар беради ҚозАхборот. ҚР Таълим ва фан вазирининг ўринбосари Асхат Аймағамбетовнинг таъкидлашича, мазкур муаммо кейинги пайтда тез-тез кўтарила бошлади. Сабаби, ўқитувчилар қоғозбозликдан бўшамайди. Уларга талай ҳужжатлар тўлдириш вазифаси юкланмоқда. “Таълим ва фан вазирлиги жорий йили махсус буйруқ чиқарди. Унда мактаб ўқитувчиси тўлдирадиган ҳужжатларнинг аниқ рўйхати кўрсатилган. Булар бешта ҳужжат – журнал, кундалик, болалар билимини баҳолаш, жадвал ва фанлар режаси. Ўқитувчи фақат шу ҳужжатларнигина тўлдиришга мажбур. Улар бошқа ҳужжатлар учун бекорга вақт кетказишга мажбур эмас”, деди А. Аймағамбетов.

Унинг айтишича, ўқитувчиларга бундан ортиқ иш юклаш мумкин эмас. Мактаб раҳбари ортиқча иш қилишга мажбурласа, шикоят ёзиш ҳуқуқига эга.

– Бундай вазиятда таълимни назорат қилиш департаментига хабарлашиш мумкин. Мазкур департамент барча вилоятларда мавжуд бўлиб, ариза тушган заҳоти тегишли чоралар қўлланилади, – деди вазир муовини. 

Шунингдек, Астана шаҳрида Август анжуманининг пленар йиғилиши ўтди. Унда вазир Ерлан Сағадиев олий ўқув юртлари учун огоҳлантириш эълон қилди. 

– Ўтган йили давлат грантлари сони 10 мингтага ортди. Жорий йили 20 мингта грант ажратилди. Демак, олий ўқув юртларида жавобгарлик ҳам ортади. Биз таълим сифатини юксалтиришга катта эътибор қаратамиз. Буни қандай назорат қиламиз? Биринчидан, ёш мутахассисларнинг ишга жойлашиш рейтинги бўйича ҳар бир олийгоҳнинг ишини баҳолаймиз. Агар мазкур кўрсаткич қуйи бўлса, унда шу ихтисослик бўйича лицензияни олиб қўямиз. Бу – асосий кўрсаткич. Сабаби, меҳнат бозорида ҳар бир битирувчига талаб бўлиши керак, – таъкидлади Е. Сағадиев. Келгусида бу коллежларда ҳам худди шундай чоралар қўлланилади.