“Жанубий Қозоғистон” газетасининг ўтган сонларидан бирида Сайрам даҳасидаги Кўктерак маҳалласида бунёд этилган спорт мажмуаси қошида бир гуруҳ спорт жонкуярлари Ирисмат Турсиметов бошчилигида ўқувчи ёшлар орасида футбол ва волейболдан ўқув машғулотлари бошланиб кетганлигини хабар қилган эдик. 

19 август – Қозоғистонда Спорт куни арафасида ушбу мажмуада ўтган вақт ичида олиб борилган ишлар якуни ва келгуси режаларини ўртоқлашиш ва фикр алмашиш мақсадида И. Турсиметовнинг саъй-ҳаракатлари билан ёш спортчиларнинг ота-оналари, устозлари,турли ташкилотлардан чақирилган меҳмонлар иштирокида ажойиб тадбир уюштирилди.

Тадбир давомида экранда ўтган давр мобойнида ўқувчилар билан олиб борилган барча чора-тадбирлар, ўқув машғулотлари намойиш этилиб, бу лавҳалар барчага манзур бўлди. Тадбир ташкилотчилари, ўқувчилар ва ота-оналарни Шимкент шаҳридаги футбол мактабининг раҳбарлари, Сайрам даҳасидаги 12-сонли спорт мактаби етакчилари, Сайрам даҳасининг тўбе бийи Қурвонбой Шамшиметов, оқсоқол Шуҳрат Раҳметов хожи, “Нұр-Отан” партияси бошланғич ташкилоти етакчиси Бахтиёр Юсупов қизғин табриклашди ва ўз совғаларини тортиқ этишди. 

Сўнг, байрам ташкилотчилари  бир гуруҳ устозларга, мураббийларга, ота-оналарга, мактаб раҳбарларига эсдалик совғаларни топширишди.

Мукофотланганлар орасида спорт мажмуаси соҳиби, тадбиркор Мирғани Маккамбоевнинг борлиги  эътиборга лойиқ. 

Тадбир Сайрам даҳасидаги вилоят ўзбек драма театрининг актёрлари ва хушовоз хонандалар Миркамол Заббархонов, Абдумажид Эргашевларнинг шўх куйқўшиқлари билан янади файзли ва жозибали ўтди.