Астана шаҳрининг 20 йиллиги ҳамда “Ҳазрат Султон” давлат тарихий-маданий қўриқхона-музейининг 40 йиллик юбилейи муносабати билан Туркистон шаҳрида мактаб ўқувчилари ўртасида XXII “Яссавийшунослик-2018” халқаро танлови бошланди. 

Мусобақада Ўзбекистон, Туркия, Қирғизистон Республикалари, шунингдек, Астана, Алмати, Шимкент шаҳарлари ҳамда Ақмўла, Алмати, Ақтўбе, Қарағанди, Қўстанай, Қизилўрда, Шарқий Қозоғистон ва Туркистон вилоятларидан 41 нафар ўқувчи иштирок этмоқда.

“Ҳазрат Султон” давлат тарихий-қўриқхона музейи ташаббуси билан уюштирилган “Яссавийшунослик-2018” халқаро таълим ва санъат кўригининг мақсади – Хожа Аҳмад Яссавийнинг маънавий мероси ва таълимоти, “Ҳазрат Султон” мақбарасига дафн қилинган шахсларнинг эли учун хизматларини, шунингдек, Туркистон шаҳрининг тарихи ва Амир Темур давридан қолган ўрта асрга тегишли қимматбаҳо буюмларни тарғиб қилиш.

Танлов икки босқичдан иборат. Биринчи босқичда ўқувчилар Хожа Аҳмад Яссавий ҳикматларини мукаммал ва бехато ёддан айтишади, иккинчи босқичда савол-жавоб тариқасида Хожа Аҳмад Яссавий мақбараси ва ундаги қимматбаҳо осори-атиқаларга тегишли саволларга жавоб беришади. Танлов якунида ғолиблар махсус диплом билан, раҳбарлик қилган устозлар сертификат билан тақдирланади.

Йигирма икки йиллик тарихга эга “Яссавийшунослик” танлови 1996 йилда бошланган эди. Дастлабки даврда шаҳар мактаблари ўртасида уюштирилган танлов 2006 йили туманлараро, 2007-2008 йилларда вилоят, 2009-2015 йилларда республика, 2016 йилдан бошлаб халқаро даражада ўтказилиб келмоқда.