Мазкур даргоҳ вилоят матбуотларида кўп бора тилга олинган. ҚРдаги ўз ўрни, ўз йўналишига эга Жанубий Қозоғистон педагогика университетининг бугунги кундаги қўлга киритган ютуқларидан кўпчилик воқиф албатта. Лекин билим даргоҳининг номи ўзгарганлигини ҳамма ҳам билавермаслиги аниқ. Талабаларнинг теран билим олиши учун бор имкониятларни яратган, замон талабларига мос равишда одимлаётган олий илм даргоҳи бугунги кунда SILKWAY халқаро университети деб аталмоқда. 

Энг сўнгги русмдаги моддий-техника базасига эга билимгоҳ хориждаги нуфузли олийгоҳлар билан ҳам ҳамкорлик қилмоқда. Жумладан, Истанбул, Хитой, Буюкбритания, Озарбайжон, Россия, Латвия, Малайзия, Кипр ва шу каби бошқа давлатдаги университетлар билан ўзаро тажриба алмашиб, талабаларга юқори билим беришга эришмоқда. Шунингдек, мазкур даргоҳнинг талабалари тилга олинган хориж университетларида таҳсилни давом эттириб, чет эллик талабаларнинг мазкур олийгоҳда билим олишига имконият яратилган. Дорилфунун ўзининг юқори малакали ва бой тажрибага эга устозлари билан фахрланади. Кўп қиррали йўналишда ёшларга билим бериб, давлатимизнинг равнақи учун билимли кадрларни етказиб беришда етакчи ўринни эгаллаган олийгоҳ раҳбарларининг хизматлари таҳсинга сазовор, албатта.