Аслида кўпдан қўлга қалам ушламаганим сабабми, кўнгилда андак хавотир изғийди. Ижодий муҳитнинг турткисими ё таваккалчиликнинг шахти биланми, мазкур оила ҳақида қалам тебратишга жазм қилдим. Осойишталикни оддийликдан топган, ҳалол меҳнатининг ҳузур-ҳаловатини қалб сокинлиги билан уйғунлаштирган онахонни деярли бутун маҳалла танийди. Ранглари сал униққан рўмолининг остидан кўриниб турган оппоқ сочлари, оқ-сариқдан келган юзидаги ажинлар унинг ҳаётнинг ажабтовур синовларидан ўтганидан дарак беради. Кўзларига инган маҳзунлик яқинларининг меҳр-муҳаббатига зор эканлигини сездиргандай, юрагини кемираётган соғинч ҳисси эса бутун вужудидан таралаётгандай гўё.
Дераза ёнидаги каравотда ётган кампир аста кўзини очди-да, даставвал шифохонанинг оппоқ шифтларини кўрди. Бир сония ўзининг қаерда эканлигини англолмай, нигоҳларини ён-атрофга қадади. Хонада анқиб турган дорининг исини туйиб, қаршисида ухлаб ётган беморни кўргач, ўзининг касалхонада эканлигига амин бўлди. Ҳа, яна келибди-да!
Эрталабки текширувдан сўнг шифокорнинг далдаси кўнглига анча таскин берди.
– Бугун кўринишингиз яхши, фақат асабийлашманг. Ҳаммаси яхши бўлади, – деди бўлим мудири.
Аслида шифокор бегона эмас, узоқ бир қариндоши. Онахоннинг уй шароити, турмуш тарзидан озми-кўпми хабардор.
Жумлаи жаҳонни яратган Эгам коинотнинг гултожи – инсонни ҳар қадамда синовдан ўтказар экан. Табиатнинг нозик хилқати – аёлни эса қирқ жонининг қирқ жойидан парчалаб, ҳар нафасда сабру бардоши, иродасини кузатаркан. Аёлнинг нозик жисми руҳан эзилганда, нимта-нимта бўлиб майдаланганда ҳам меҳр-муҳаббатни, сабру қаноатни коинот кенгликларидан, ястаниб ётган салобатли тоғлардан олиб, ўзининг азиз жонидан яратган дилбандини ҳатто майин шабадага ҳам раво кўрмай, киприкларининг устида асрар экан.
... Зулайҳонинг феъл-атвори кундан-кун ўзгариб борар, уйдаги зиддиятлар авж олиб, охири жанжал билан тугарди.
Онанинг ҳовлига чиқишга юраги тоб бермас, ўз хонасида тамадди қилиб оларди. Кунлар шу зайлда давом этавергач, асаби таранглашиб, юраги тез-тез санчийдиган бўлиб қолди. Бу ҳол сўнгги вақтларда тез-тез такрорлансада, ўғлига “шифокорга олиб бор” дейишга ботинолмади.
Шундай кунларнинг бирида она ошхона томон йўл олди. Тимирскиланганча, амаллаб қозондан ярим коса мошхўрда қуйиб, хонаси томон қадам ташлади. Ним қоронғи хонада овқатини еркан, ич-ичидан келаётган аламли йиғини аранг босар, қалтираган қўллари қошиқ тутишга-да мажолсиз эди.
На илож, кўргилик эканда, оқ ювиб, оқ тараган, еру кўкка ишонмай ўстирган дилбандининг роҳатини кўриб яшайман, деганди. Афсус, тақдирнинг ёзиғи бошқача экан. Майли, шунисига ҳам шукр! Боласи ёнида, соғ-омон. Аслида ҳар бир онанинг тилаги ҳам шу. Овқатлангач, идишларни йиғиб, ювишга уринди. Ҳали келини келса, аччиқланиб юрмасин тағин, дея ўрнидан қўзғалди. Нон ушоқларини ҳар сафаргидай ҳовлининг бир четига аста сепаркан, чуғурлаб учиб келган каптарларни томоша қилиб, ўйга толди.
Яратганнинг мўъжизасини қаранг, тумшуқчалари билан нон увоқларни териб ейишаркан, чуғурлашиб, ўзаро “гаплашишарди” баъзилари. Ким билади, бугунги ризқ-насиба учун балки Яратганга шукрона келтиришаётгандир ўз тилларида.
Инсонлар эса... Ўтган ҳар бир кунига шукрона у ёқда турсин, бевафо дунёнинг арзимас матоҳларини талашишади, оқибат, меҳр-муҳаббат, диёнат каби инсоний хислатлардан бегона ўтишади. Охиратнинг жавобларини эса қиёматга қолдиришади...
Шуларни ўйларкан, бирпас томоша қилгач, кўнгли жойига тушди. Эрталабки нохушлик ҳам тарқагандек бўлди. Косасини аранг ювиб бўлгач, астагина кўчага йўл олди. Ўтган-кетганлар, қўни-қўшнилар билан суҳбатлашса, қалби анча ором топадигандай сезди ўзини. Дарвоза ортидаги сўрига етгач, аста жойлашди.
Кўчада одам сийрак, кимдир ишга шошади, кимдир ўқишга, дегандек. Қани эди, неваралари ёнида бўлса, ая етаклаб боғчасига олиб бориб қўярмиди? Кўнглига келган ўйдан ўзи ҳам алланечук бўлди. Неваралари нима қилишаётган экан-а? Уларни кўргиси келди. Айниқса, кенжасини. Ўзига ўхшагани учунми, шунисига қаттиқ меҳр қўйди, опичлаб катта қилди. Енгларининг учига тугилган ширинликни доимо унга илиниб турарди. Энди эса улар узоқда. Келини онасиникига олиб бориб қўйган. Шаҳарда ўқитармиш. Аслида, гап бошқа ёқда, болаларини қайнонасига йўлатмаслик.
Соғинч ҳисси кучайиб борар, неваралари кўз олдидан ўтарди. “Бувижон”, деб чопиб келадиган болажонларини маҳкам бағрига босгиси, тўйиб-тўйиб искагиси келди. Дилгир юраги яна юмшаб кетди. Ғамгин кўзларидан оқаётган ёшларини енгининг учи билан артаркан, киши билмас ичдан тўйиб-тўйиб йиғларди.
Шу заҳоти қўшни келин кўринди. Қўлидаги халтачада иккитагина иссиқ нон, ширинлик, 3-4та олма олиб келганди. Бу жувон мазкур хонадоннинг турмуш тарзи билан таниш, онда-сонда опага бир коса иссиқ овқат илиниб туради.
Одатий салом-аликдан сўнг икки аёл у ёқ бу ёқдан гурунглашиб ўтиришди.
– Келинингиз ишдами? – дея сўради қўшниси.
– Ҳа, ишда, кечроқ келади. Иши қийин-да, жуда чарчаб келади. Унга ҳам осонмас, – деди.
Суҳбатдоши келинига тил теккизмаётган қайнонага қараб, индамади. Ахир уйдаги жанжаллар, қайнона-келин орасидаги келишмовчиликлардан хабари йўқ, дейсизми ён қўшнининг. Албатта эшитади-да, ахир келинининг ўзи бутун маҳаллага жар солиб, қайнонасини кун бермаётгани, ҳатто невараларини сиғдирмаётгани, шунинг учун онасикига олиб бориб қўйганини ҳадеб айтаверса.
– Майли, мен борай, – қўшни келин аста қўзғалди.
– Соғ бўлинг, болам, неваралар роҳатини кўринг,– алқади онахон.
У кетгач, халтачани очиб қаради. Олмаларни олиб, ён чўнтагига солди. Невараларим келса, бераман, дея орзуланди бечора кампир. Кўнглига бир илиқлик югурди. Ўзича хиёл хурсанд бўлди. Лекин қувончи узоққа чўзилмади. Ишдан қайтган келинининг тепасига келиб қолганини ҳам сезмабди. Унинг кўзларидаги қаҳр лабларига кўчиб, қайнонасини қистовга олди.
– Ҳа, яна қўшниларга мени ёмонлаб, ювинди сўраб ўтирибсизми, жонга тегдингиз-ку!
Бечора қайнона оғиз жуфтлашга ҳаракат қилди-ю, индамай қўя қолди. Чунки, ўзини оқлаш фойдасиз, келинининг чакаги баттар очилади. Бир амаллаб, ўрнидан турди-да, хонасига йўналди. Эшикни ичкаридан ёпиб, ўрнига жойлашди. Яна хаёлга чўмди. Ўтган умри кўз олдидан тасмадай ўта бошлади.
... Мактабни битириб, оппоқ орзулар билан мустақил ҳаётга қадам қўйган қизини отаси дўстининг ўғлига унаштириб қўйди. Онасининг ҳам дийдиёсига қарамаган қаттиққўл отанинг раъйни ҳеч ким қайтаролмасди. Отанинг ҳар каломи уйда қонун эди. Тақдир эканда, Сабоҳат дугоналари каби олийгоҳларда билим ололмади, талабаликнинг олтин даврини келинликнинг вазифасига алмашди.
Орадан йиллар ўтсада, икки ёшнинг фарзанд иштиёқида бормаган эшиги, кўринмаган шифокори қолмади. Уйдаги таранглашиб бораётган вазият ҳам майли, эрининг мунгли кўзларига қарай олмай Сабоҳат етти йилини шу алфозда ўтказди. Дарди дунёси бир бўлиб, хизматини қилиб юраверди.
Лекин Аллоҳ сабр қилганларга мукофотини бераркан. Уйда чақалоқ йиғиси эшитилиб, кунлари нурафшон бўлди, ҳаётларига мазмун кирди. Тақдирнинг ҳазилини қарангки, боласи икки ёшга тўлар-тўлмас, автоҳалокат туфайли турмуш ўртоғидан айрилиб, Сабоҳат қон йиғлаб қолаверди. Эридан қолган ёлғизини еру кўкка ишонмай, ўстирди. Ўғлининг оғзидан чиққанини муҳайё қилар, унга ҳаддан ортиқ меҳр қўйганди. Фарзанд шундай муҳитда катта бўлди. Вояга етса-да, келажаги ҳақида умуман ўйламади. Онасининг мактабдаги фаррошликдан топган маошига кун кўришар, етмаганига онаси қарз оларди.
Дилшод бир ишда қўним топмас, ё иши ёқмасди, ё ишдаги одамлар. Қисқаси, ишлашга бўйни ёр бермасди. Аҳвол шу тариқа давом этар, кун кетидан қувиб, йил ўтарди. Бечора она изтиробда, боласининг эртаси учун қайғурарди. Охири бир тўхтамга келди. Уйлантиради! Шу хаёлда сандиғини очди, рўзғоридан орттириб, йиққан матоларини кўздан кечирди. Озми-кўпми бор экан. Шу алфозда бироз тургач, Аллоҳга таваккал қилди. Ўғлининг кўнглига қўл солиб кўрди. Аввалига кўнмаган ўғли бир-икки ой ўтгач, рози бўлгандай бўлди. Онаизор не-не орзулар билан келин излашни бошлади. Арзанда ўғлига эса буниси ҳам, униси ҳам ёқмасди. Охири қўшни қишлоқдан бир оиланинг қизига унаштиришди.
Ёлғизгина дилбандининг келишган бўй-бастига қараб, не-не орзу-умидлар дунёсида ҳаёт кечирарди. Вақти-соати етиб, Дилшоднинг тўй куни яқинлашди. Куёв бола сарпосидаги ўғлига термулиб қараркан, онанинг кўз ёшлари тинмасди. Ахир бу кунларга етиш осон бўлдими?
Карнай-сурнай наволари остида кириб келган келинчакнинг юзлари лов-лов ёнар, гуё келин билан қўшилиб, остонасига бир дунё бахт кириб келар эди...
Орадан йил ўтиб, оилада биринчи невара туғилди. Шодликлари чексиз эди. Қайнона келинини ҳар доим алқар, маҳаллага мақтайверишдан, чарчамасди. Арзанда келин эса бутун уй ишларини қайнонага топшириб қўйди, йил ўтиб, кетма - кет яна икки қиз туғиб берди.
Йиллар шу зайлда ўтар, келини умуман ошхонага кирмас, қайнонаси тайёрлаган овқатни ерди. Буниси ҳам майли, сўнгги вақтларда қайнона ҳам ёқмай, бўлар-бўлмасга жанжал чиқарадиган бўлди. Эрини бутунлай эгиб олган Зулайҳонининг оилада айтгани айтган, дегани деган эди.
Бундай зуғум остида ҳаёт кечириб бўлмас, бечора она бир-икки марта касалхонада даволаниб ҳам чиққанди.
... Лекин сўнггиси ортиқча бўлди. Кечқурун ишдан қайтган эр-хотин онага ўз қарорларини айтишди. Нима эмишки, уйларини сотиб, шаҳарга кўчишармиш! Айтишга осон, лекин бутун умрини ўтказган, орзу-ҳаваслари ушалган ардоқли маскан, невараларининг илк тетапояларига гувоҳ бўлган ҳовли, қолаверса, турмуш ўртоғидан қолган ягона ёдгорлигини ташлаб кетиш бу аёл учун туганмас азоб эди.
Бу ҳам майли, томошанинг қизиғи бошқа томонда эди. Онани қариялар уйига топширишармиш!
Аслида бу гапни она хонасига ўтиб кетаётганда, беихтиёр эр-хотиннинг гапларидан эшитиб қолди. Эшитди-ю, мияси ғувиллаб, боши айланиб, кўз олди қоронғилашиб кетди.
Амаллаб хонасига етиб олгач, ичкаридан илиб олди. Зил-замбилга айланган бошини кўтаролмай, ёстиқни маҳкам қучоқлаганча, юм-юм йиғлади. Ҳа, у энди оилада ортиқча экан!
Бутун умр “болам” деб яшаган, суякларини зирқиратиб, этларидан ажратиб топган боласига бу кун керакмас бўлиб қолди. Оддий бир матоҳдек қадрсиз эди. Ҳа, боласи ундан воз кечмоқчи!
Шу тун унинг уйқуси келмади, аниқроғи, ухлолмади. Ўйлаб ўйига етолмасди. Шу алфозда тонг орттирди. Бироз ётди-да, бомдодга қўзғалди. Таҳоратини олгач, намозини ўқиди. Сўнг жойнамоз устида қўлларини дуога очди:
– Ё Раббим, гуноҳларимни ўзинг кечиргайсан. Сен карами кенг мағфиратли Зотсан. Сенга ҳамд ва мақтовлар бўлсин. Илоҳим, охиратимизни обод, жавобларимизни осон қилгин.
Барибир она-да, дуосида ҳам дилбандини унутмайди, ҳар сафаргидай яқинларига омонлик, тинчлик, хотиржамлик сўрайди. Қалбларига иймон нурини, ҳақ йўлдан адаштирмаслигини тилайди.
Бир кунда дол бўлган ғарибгина танасини аранг тиклаб, қадам ташлайман деганди, негадир, танаси чайқалиб кетди. Боши айланиб, ўтиришга чоғланди. Баногоҳ ўзини тутолмай қулади...
... Шу алфозда бир-икки кун касалхонада ётгач, бир қарорга келди. Палата шифокорига дардини баён қилди. Шифокор ҳам кекса онахоннинг гапларини тинглагач, бошини чайқаб, индамай палатани тарк этди. Эртаси куни эрталаб, текширувдан сўнг, онага яқинлашиб, гап бошлади:
– Қариялар уйи бошлиғи билан гаплашдим. У рози. Мен ҳужжатларни тўғрилаб қўйдим. Эртага ўзим олиб бораман.
Она тўғри қарор қабуллаганига ўзида ишонч ҳосил қилди. Томчи тошни ёради, деганларидай, йиллар давомида йиғилган алам бир куни ўзини англатди. Боласини қийнамай, тинчгина масалани ҳал қилиб қўя қолди.
Касалхонадан чиқар экан, оёқлари негадир юрмас, ортда қолган жигаргўшаси–ёлғизини ишонмасди. Тинмай ортига ўгирилар, гўё, фарзанди излаб келаётгандай туюлаверарди...