Дадамни ўлдиришди!
Тунги соат учдан ўтди. Тахминанинг эшигини жияни Нозима қаттиқ уриб, бақириб йиғларди:
– Тахмина опа, ойим дадамни ўлдириб қўйди! Тезроқ чиқинг!
Тахмина тез кийиниб, синглисининг хонасига кирди. Волиданинг ранги оқариб кетган, стулда асабийлашиб ўтирарди.
– Сингилжон! Наҳотки ўлиб қолган бўлса? – ишонмай сўради у.
Волида базўр бошини кўтариб, лаблари қалтираб, деди:
– Бугун яна ичиб келди. Келасолиб, тепкилай бошлади. Чидай олмадим. Това билан бошига урдим.
Ранги баттар оқариб, давом этди:
– Биламан, одам ўлдирганим учун қамашади. Лекин, қамалгим келмаяпти, опажон! Қочиб кетайми? Бошим оққан томонга кетиб қолайми?
Тахмина синглисини қучоқлаб, деди:
– Йиғлама! Бирон иложини қилармиз.
Жиноий иш материалларидан:
– Фуқаро Пирматова, сиз синглингизнинг эри билан жанжаллашиб, оғир нарса билан бошига урганингизни тасдиқлайсизми?
– Ҳа, това билан урдим.
– Экспертиза хулосалари товадаги бармоқ излари синглингизга тегишли эканини кўрсатди. Хўш, Валижон Азимбековни ким ўлдирди?
– Мен. Уни уриб, товани синглимга бердим. Шу пайтда Волиданинг бармоқ излари қолиб кетгандир.
Энага
Тахмина шу куни тунда юз берган мудҳиш воқеани эслашга ҳаракат қилди:
– Полицияга хабар бердик. Энди бундай қиламиз. Ўлсам ҳам сени қаматиб қўймайман. Болаларинг бор, мен эса, ёлғизман.
Волида, полиция сўраса, опам ўлдирди, деб айт!
– Айтмайман! Мен ўлдирдим, жавобини ҳам ўзим бераман. Ҳозир бориб, ўзимни ўзим осаман.
– Йўқ, сингилжон, гуноҳингга гуноҳ қўшма. Айтганимни қил, олам гулистон!
Хаёл уни олисларга олиб кетди. Синглиси Тахминадан ўн ёш кичкина. Онаси кўпинча ишга кетаётиб, Волидани унга ташлаб кетарди. Бир куни синглисини овунтира олмади. Ўн чақирим пиёда юриб, онаси ишлаётган далага борди. Онаси ва унинг ёнида ишлаётган аёллар бир муддат кўзларига ишонолмай туришди. Аёллардан бири онасига:
– Сарви, қизинг бинойидай энага бўлиб қолибдику, – деди.
Шу пайтдан бошлаб уни “энага” дейдиган бўлишди.
Тошюрак
Валижон ва Волида турмуш қургач, бир неча йил туман марказида ижарада туришди. Валижонни ишхонасида қисқартириб юборишгач, ижара ҳақини ҳам тўлай олмай қолишди. Синглисидан хабар олишга келган Тахмина аввал уларга пул бериб турди. Кейин, болалари оч қолаётганини кўриб, ота-онасидан қолган уйга кўчириб олиб келди. Уйнинг ярмини уларга бўлиб берди. Орадан бир ҳафта ўтмай, олиб келганига афсуслана бошлади: кеч тушди дегунча, уйнинг улар яшаётган қисмидан қий-чув, тўполон бошланарди. Жияни Нозима чиқиб, дадаси ойисини ураётганини айтса, дарров чиқиб, эр-хотинни тинчитиб келарди. Бир куни Валижон Тахминага деди:
– Опа, нега бировнинг оиласига бурнингизни суқаверасиз, ахир эр-хотиннинг ўртасига эси кетган тушади, деган гап бор. Қизим чақирса, югуриб кираверасизми. Ўзингизнинг ёмонлигингиздан қирққа чиқсангиз ҳам эр олмаяптику, ўйлаб иш қилинг-да!
Тахмина қўшни йигит Ёдгор билан аҳду-паймон қилиб қўйган эди. Бир куни Ёдгор ичиб келиб, аслида унга эмас, синглиси Волидага ошиқ эканини айтди. Шу-шу Ёдгор билан алоқани узди, бошқа йигитлар билан гаплашмай қўйди: юраги тошга айланган эди, гўё.
Синглим учун жонимни ҳам бераман!
– Ўшанда синглим учун жонимни ҳам беришга тайёр эдим. Шунинг учун қамоқхонада бир муддат бўлса ҳам жиноятни бўйнимга олганимдан афсусланмадим. Колонияда яшаш даҳшат эканини айтмай қўяқолай. Саккиз йил яшаш эса...
– Волидани қандай кўндирдинг?
– Терговчига уни тилдан қолди, деб айтдим. Касалхонага ётқиздим. Валижонни бир ўзим ўлдирганим, у аралашмаганини айтиб, ишонтирдим. Синглимни ҳар куни ураверганидан қаттиқ жаҳлим чиққан эди, – дедим.
Тахминани полиция машинаси олиб кетаётганида Волиданинг «опажон» деб югургани ҳали эсида.
Хатлар
Қамоқдаги аёлнинг қувончи нимада? Тутқунликдаги одамни нима хурсанд қилиши мумкин? Баъзиларга озиқ-овқат солинган тугунлар, баъзилар учун яқинларининг телефон қўнғироғи. Қамоқхонанинг эшиги ёпилган кундан бошлаб Волидадан келган хатлар Тахминанинг қувончига айланиб қолди. Аввалига Волида опасига тез-тез хат ёзиб турди, ҳатто бир неча марта бориб кўрди. Сўнг хатлар камайиб, умуман келмай қўйди. Бир куни Тахминага яқинларига қўнғироқ қилишга рухсат беришди. Ҳаяжондан қўллари қалтираб, синглисининг рақамини терди. Телефоннинг нариги томонидаги Волида опасининг овозини эшитиб, ҳайрон бўлди.
– Опа, сиз қамоқхонада зерикиб ўтиргандирсиз, менинг ишларим бошимдан ошиб-тошиб ётибди, нима демоқчи эдингиз, тезроқ айтинг!
Тахмина, албатта, синглисидан бундай муомалани кутмаган эди. Нима дейишини билмай, бир зум каловланиб қолдида, деди:
– Кечир, сингилжон, билмай сенга қўнғироқ қилиб юборибман...
– Биласизми, қамоқхонада менга нима қувват бағишларди? Ёдгорни эслардим. Ундан икки марта хат олдим, мастликда ёлғон гапирганини, фақат мени севишини ёзди. Мен ҳам қизиққонлик қилиб, унга бекорга рад жавобини берган эканман.
Кутилмаган меҳмон
Шарқ донишмандларидан бири миннатдорлик ҳисси узоққа чўзилмаслигини таъкидлаган экан. Бу гап худди Волидага тегишлидай. Биринчи йили колонияга тез-тез хат ёзиб турди, иккинчи йил камайтириб, учинчи йили умуман ёзмай қўйдию, бир куни хатида турмушга чиқаётганини маълум қилди.
Шу куни Тахмина умуман ухлай олмади. Синглисини ўйлади. «У турмушга чиқаётган йигит жиянлари Нозима, Нодира, Нодиржонларни қандай қабул қилар экан? Ўгайлик қилмасмикан?».
Баҳор келди, қамоқнинг тўртинчи йили бошланаётганда Тахминани намунали тартиби учун муддатидан аввал шартли равишда озод қилишди. Қишлоғига келиб, тонг ҳавосидан чуқур нафас олди. Ўзи ўсиб-унган уйга яқинлашганда қалбини ҳаяжон чулғади. Уй таъмирланган, деразаларига янги парда илинган.
– Қизиқ, – ҳайрон бўлди Тахмина. – Озодликка чиққанимни ҳеч кимга айтмаган эдим, булар менинг келишимни байрамона кутиб олишяпти. Ҳатто, янги дарвоза ҳам ўрнатишибди-я.
Эшикни очган Волида шошганидан нима дейишини билмай қолди:
– Опа? Ҳали тўрт йил ўтришингиз керак эдику, чиқаришдими? Мен сизнинг хоналарингизга ижарачиларни қўйган эдим. Сиз Анзират холамникида яшашингиз мумкин, гаплашиб қўйдим, ўғиллари чет элга ишлашга кетган, бир ўзи турибди.
– Нега сеникида эмас, сингилжон?
– Болаларимнинг қамоқдан чиққан аёл билан яшашини хоҳламайман, уларнинг тарбияси бузилиб кетиши мумкин. Хоналарингизни ижарага беришга мажбур бўлдим. Сиз кетганингиздан кейин бизга яшаш осон бўлди, деб ўйлаяпсизми? Бошимизга не кунлар тушмади! Ёдгорга турмушга чиқишга мажбур бўлдим...
– Ёдгор? – синглисининг бошқа сўзлари Тахминанинг қулоғига кирмади.
У тўрт йил давомида қаттиқ толиққани энди сезила бошлади. Синглисига тикилди. Уни, қутқараман, деб, даҳшатли жиноятни бўйнига олган, ноҳақ жазоланган йиллар ортда қолди. Лекин синглисининг кўзларида нафрат, қўрқинч ва тушкунликни кўра олди, холос. Синглиси, қишлоғи, ҳатто, эндигина кириб келган баҳор ҳам бегонадай туюлди унга.
– Сингилжоним, сен қўрқма, мен кетаман, – дедию, темир йўл станциясига қараб йўл олди.
***
Темир йўл станциясига етай деб қолганида уни полиция ходимлари тўхтатишди ва машинасига ўтқазиб, ички ишлар бўлимига олиб боришди.
– Ўртоқ капитан, фуқаро Ҳусановани олиб келдим, – деди полиция ходими унинг жиноий ишини судга тайёрлаган терговчига.
– Фуқаро Ҳусанова, бизни алдаган экансизда, Валижон Азимбековни синглингиз Волида Ҳусанова ўлдирган экан.
– Нега ундай дейсиз? – сўради Тахмина, – ахир...
– Жиноят юз берган куни жиянингиз Нозима воқеани қўл телефонига тушириб олган экан. Яқинда ижтимоий тармоққа чиқарди. Менимча, жиянингиз бу видеони ўзи билмаган ҳолда чиқариб юборган, икки кундан кейин олиб ташлади. Мана, ўзингиз кўринг.
Тахмина телефонга қарадию, унда акс эттирилган даҳшатли воқеани кўриб, ҳушидан кетди. Ҳушига келганида терговчи сўради:
– Хўш, энди нима қиламиз? Энди, қонун бўйича, сизни оқлаб, синглингизни қамашимиз керак.
– Ундай қилманг. Яхшиси, видеони йўқотишга ёрдам беринг. Бир одамнинг ўлими учун икки одамни жазолаш ҳам инсофдан эмасдир. Синглимни мен кечирдим. Ёлғон гувоҳлик берганим учун мени ҳам кечиринглар. Менинг ўрнимда бўлганида ҳар қандай опа шундай йўл тутган бўларди.