Туркистон шаҳрида “Туғилган юртга таъзим” кенг қамровли лойиҳаси бошланди. “Ватандошлар” жамғармаси ташаббускор бўлган тадбирнинг вазифаси – олис-яқин чет элларда, Австрия, Англия, Франция, Швеция, Эрон, Хитой, Монголия, Тожикистон, Россия, Беларусь, Ўзбекистон ва Қирғизистонда яшайдиган қондошларга бағишлаб, Қозоғистоннинг муқаддас қадамжоларига тарихий-маърифий саёҳатлар уюштириш.

Икки кунлик экскурсияни дастлаб Туркистонда ўтказишдан мақсад – ватандошларга Хожа Аҳмад Яссавий, Арслонбоб мақбаралари, Туркистоннинг тарихий музейи ва ҳудуднинг бошқа манзарали жойларини таништириш орқали қозоқ халқининг маданий ва маънавий қадриятларини тарғиб қилиш.

Барча туркий эллардан ота юртига ташриф буюрган қондошларнинг қадамлари қутлуғ келишини тилаб, уларни эҳтиром билан қарши олган вилоят ҳокими Ж. Туймебаев бундай муҳим учрашув Элбошининг “Келажакка йўлланма: маънавий янгиланиш” дастурий мақоласи доирасида уюштирилганини айтиб, иштирокчиларга Туркистонни туркий оламнинг маънавий марказига айлантириш вазифаси бугунги кунда қандай амалга оширилаётганини маълум қилди.

– “Маънавий янгиланиш” дастури доирасида 2018 йили вилоятда 46та лойиҳа ҳамда 168та тадбирлар белгиланиб, ўтказилмоқда. “Туғилган ер” махсус лойиҳасининг “Атамекен” кичик дастури доирасида Туркистон вилоятида 2018 йили 28 млрд. 156 млн. тенгелик лойиҳалар, яъни 428та иншоот (вилоят кўчирилгунга қадар барчаси 445та иншоот) қад ростлади, шу жумладан, қиймати 887,2 млн. тенгелик 23та иншоот фойдаланишга топширилди. Дастурда белгиланган бош масалаларнинг бири – одамни билимли, баркамол қилиб тарбиялаш. Дастурга кўра, муқаддас қадамжоларнинг рўйхатини шакллантиришга тавсиялар тайёрлайдиган тарихчилар, олимлар, археологлардан иборат махсус ҳудудий ишчи гуруҳи тузилиб, вилоятимиздаги муқаддас, кўҳна иншоотларнинг рўйхати сараланди, ҳудудий харита лойиҳаси тайёрланди, – деди минтақа раҳбари.

Ҳозир Қозоғистоннинг тарихий қадамжолари рўйхатига 185та умуммиллий ва 500та ҳудудий даражадаги иншоотлар киритилган.