Шимкентда бадиий гимнас­тикадан Алия Юсупова соврини учун  VII хал­қаро турнир  маррасига етди. Бу йил нуфузли мусобақада 8 мамлакатдан гимнастикачилар қатнашиб, ғалаба шоҳсупасига қозоғистонлик ҳамда россиялик спортчилар кўтарилишди. 

Финал беллашувларида  жаҳоннинг турли жойларидан йиғилган энг таниқли спортчилар куч синашди. 

– Бугунги мусобақада ёшлар,  ўсмир­лар орасида чемпионлар аниқ­ланди, – деди вилоят бадиий гимнастика  федерацияси раиси Муслим Шоназаров. – Ўсмирлар орасида шимкентлик қизимиз Эльжана Таниева ғолиб деб топилди. Ёшлар орасида россиялик Дария Придан­никова зўр маҳорат кўрсатиб, юқори ўринни эгаллади.

Кўпкураш натижаси бўйича россиялик Юлия Бравиковага тенг келадигани топилмади.  У ўз ёшидги жаҳоннинг машҳур гимнастикачиларини ҳам лол қолдирди. Шундай қилиб, Юсупова турнирида у пешқадам бўлди. Кумуш медаль Қозоғистоннинг шаънини ҳимоя қилган Алиянинг  шогирди Сабина  Аширбаевага буюрди. Бронза медаль эса Қозоғистон Республикасининг бир неча карра чемпиони Алина Адилхановага насиб этди.  

Эндиликда Осиё чемпионатидаги нуфузли  мусобақада қозоқ қизларининг ғалаба шоҳсупа­сидан кўринишига ишонч бор.