Туркистон шаҳридаги Есимхан май­донида “Туркистон – туркий оламнинг маданий пойтахти” йили доирасида Қозоғистон халқ артисти Жамал Ўмарованинг 105 йиллигига бағишланган ХХ ТУРКСОЙ халқаро опера фестивали ўтказилди.

Тадбирни вилоят маданият бошқармаси раҳбари Нурбўлат Ахметжанов ҳамда Туркистон шаҳри ҳокими Алипбек Ўсербаев очди.

Фестиваль – туркий забон этнослар орасидаги ҳамкорлик алоқаларини ҳамда дўстликни мустаҳкамлаш, туркий элларнинг миллий опе­ра­ларини янгилаш, бирлигини кучайтириш, замонавий опера санъатининг ёрқин вакилларини таништириб, уларнинг ижодини тарғиб қилиш мақсадида уюштирилди.

Фестивалнинг бош дирижёри – Қозоғистонда хизмат кўрсатган арбоб, Абай номидаги Қозоқ давлат академик опера ва балет театри директори ҳамда бадиий раҳбари – Асқар Бўрибаев. Фестивалда Қорақалпоғистон халқ артисти, Ўзбе­кистондаги А. Навоий номидаги давлат академик опера ва балет театри дирижёри Аида Абдуллаева ҳамда вилоят опера ва балет театрининг бош дирижёри Қуаниш Исмаиловлар иштирок этдилар.

Шунингдек, ХХ ТУРКСОЙ Халқаро опера юлдузлари фестивалида Туркия, Қирғизистон, Ўзбекистон, Қорақалпоғистон давлатлари ҳамда Астана, Алмати, Шимкент шаҳарлари опера юлдуз­ларининг қўшиқлари янгради. Жумладан, Қирғизистонда хизмат кўрсатган санъаткор Асел Бекбаева, Қорақалпоғистонда хизмат кўрсатган артист Женисбек Пиязов, Туркиядан халқаро танловлар лауреати Чанер Акгюн, Ўзбекистондан халқаро танловлар лауреати Неъмат Ҳабибов, Астана опера ва балет театри солисти, ҚРда хизмат кўрсатган арбоб Жан Тапин ва бошқа кўплаб танлов лауреатлари саҳна тўрида санъа­тини намойиш этишди.