Яқин кунларда юртимиз Мустақиллигининг 27 йиллигини нишонлаймиз. Ўтган давр ичида мустақил Қозоғистонимизни жаҳон ҳамжамияти тан олди. Глобаллашув, жаҳон иқтисодий бўҳрони даврида ҳам республикамизда ижтимоий-сиёсий аҳвол барқарор бўлиб турибди. Бу – барча қозоғистонликларнинг бахти, ютуғидир.
Республикада тинчлик ва осойишталикни қарор топтиришда фуқаролар тотувлиги давлат мустақиллигининг асосий гарови эканини яхши англаган «Нур Отан» партияси ва унга раҳбар бўлиб келаётган Президентимиз Нурсултан Назарбаевнинг ҳиссаси беқиёс. Қозоғистонликларни «Нурли йўл» сари бошлаган Мангу Элнинг саркори – Элбошимиз билан ҳар қанча фахрлансак арзийди.
Чорак асрдан бери Мустақиллигимизнинг ҳар бир йили юртимизда эркин демократик жамиятни барпо этиш солномасини алоҳида, сермазмун саҳифа билан безаб бормоқда. Истиқлол маънавиятимиз, умримиз, тафаккуримиз, турмуш тарзимизда ўзига хос из қолдирмоқда.
Бугун биз ўтган аср тўқсон биринчи йилининг декабридан бошланган янги, эркин ҳаётимиз тарихига назар ташлаб, шу йиллар ичида Элбошимиз Нурсултан Назарбаев раҳбарлиги остида амалга оширган ишларимизни сарҳисоб қилар эканмиз, қисқа вақт ичида буюк ва асрга татигулик шонли йўлни босиб ўтганимизни ҳис қиламиз. Фақат биз эмас, жаҳон ҳамжамияти Қозоғистон ўзи танлаган, халқига, миллий манфаатларига хос ва мос йўлдан дадил одимлаётганига, ҳар бир йилни барча соҳалар бўйича муваффақиятли якунлаб, янада фаровон ва бахтли ҳаёт тадоригини кўраётганига гувоҳ бўлиб турибди.
Президентимиз Нурсултан Назарбаев «Хотирани асраш – тотувликни мустаҳкамлаш» номли китобида Мустақилликнинг илк йилини «асрга татигулик йил» деб атаган. «Хотира – ҳаётимизнинг асоси. У – инсон зоти то бу ҳаётда яшар экан, мангу йўлбошчи. Хотира – дарс, хотира – сабоқ. Тарихий хотирасиз келажак йўқ. Хотира – истиқболимиз пойдевори», – ёзади юртимиз раҳнамоси.
Йигирма етти йилдирки, шу неъматдан – Мустақиллик нуридан баҳрамандмиз. Хўш, нималарга эришдик?
2017 йилдан Қозоғистон Бирлашган Миллатлар Ташкилоти Хавфсизлик кенгашининг муваққат аъзоси бўлди. Қозоғистон МДҲ ва Марказий Осиё мамлакатлари ичидан “ЭКСПО-2017” халқаро кўргазмасини ўтказиш учун жаҳон ҳамжамияти танлаб олган дастлабки давлатдир. Биз МДҲ ва Марказий Осиё мамлакатлари орасида биринчи бўлиб жаҳон миқёсида шундай аҳамиятга эга тадбирларни ўтказдик.
Алмати шаҳрида “Универсиада – 2017” доирасида спорт мусобақалари ўтди, уларда 57 мамлакатдан 2000 спортчи ва делегация аъзолари иштирок этишди. Буларнинг ҳаммаси тўғри сиёсий йўлимиз ва Қозоғистоннинг халқаро миқёсдаги юксак обрўси туфайлидир. Қозоғистон 2050 йилга бориб жаҳоннинг ривожланган 30 мамлакати қаторига кириши керак. Биз, шу мақсад сари дадил бормоқдамиз.
Евроосиё минтақасининг молиявий, амалий, инновациявий ва маданий маркази сифатида шаклланишини таъминлаган ҳолда янги пойтахтимиз – Астанани барпо этдик. Аҳоли сони 18 миллиондан ошиб, умр ёши узунлиги 72,5 йилга етди.
Биз мустаҳкам иқтисодий замин ҳозирладик. Кейинги 20 йил ичида мамлакатимизга 300 миллиард АҚШ доллари ҳажмида бевосита чет эл сармояси жалб этилди.
Иқтисодиётни юксалтиришнинг негизи саналмиш кичик ва ўрта бизнес ривожланиб бормоқда. Бутунжаҳон банкининг бизнес юритиш имтиёзлари рейтингида Қозоғистон 190 мамлакат ичида 36-ўринга кўтарилди.
2014 йилда мамлакатимиз инфратузилмасини янгилайдиган “Нурли йўл” мажмуавий дастурини амалга оширишни бошладик. Бундан 3 йил муқаддам “100 аниқ қадам” – Миллат режасини эълон қилдик. Шундан сўнг, мамлакатимизнинг Учинчи янгиланишига киришдик. Унинг бош вазифаси – Қозоғистоннинг дунёвий рақобатга қобилиятлилигини таъминлай оладиган иқтисодий ўсишнинг янги моделини қуриш. Мамлакатимизнинг барқарор ривожланиши турмуш даражасининг янада ўсишига комил ишонч уйғотади.
Президентимиз Мактубида таъкидланганидек, “жаҳонда рақобатнинг ўсиши ва барқарорликнинг йўқлиги туфайли мен 2012 йили халқимизга таклиф этган “Қозоғистон – 2050” стратегиясининг долзарблиги ошмоқда. Биз олдимиздаги қийинчиликларни ўз вақтида кўра олдик. «Нурли Йўл» иқтисодий сиёсати ва «100 аниқ қадам» Миллат режаси туфайли биз мураккаб дунёвий ўзгаришларнинг дастлабки босқичидан муносиб ўтмоқдамиз. Фақат 2014-2016 йилларнинг ўзида иқтисодиётни қувватлаш учун қўшимча 1,7 триллион тенге ажратдик. Бунинг ҳаммаси иқтисодий ўсиш ва бизнесни қувватлаш, 200 000дан ортиқ янги иш ўринлари яратиш имконини берди. Натижада, 2016 йил якунига кўра ички ялпи маҳсулотнинг 1 фоизга ўсиши таъминланди. Бугунги мураккаб шароитларда бу жуда муҳим”.
Президентимиз Нурсултан Абишевич Назарбаев «Нур Отан» партиясининг съездида келажаги ягона миллат ғоясини илгари сурган эди. Унда олти мақсад қўйилган: этнослар тенглиги, учтиллилик сиёсати, ўрта синф – Қозоғистон миллатининг асоси, «Мангу Эл» концепцияси асосида ҳужжат ишлаб чиқиш, мактаб дастурига – «Мангу Эл» умумқозоғистон ғоясининг қадриятлари» номли янги фанни киритиш ва диннинг муҳимлиги.
Жорий йилда Элбошининг “Қозоғистонликлар фаровонлигининг ўсиши: даромад ва турмуш сифатини ошириш” Мактуби эълон қилиниб, унда белгиланган вазифалар жадал амалга оширилмоқда. Натижада, ҳар бир инсон, ҳар бир оила, айниқса, ёш оилаларга ғамхўрлик кўрсатиш юксак даражага кўтарилди. Кексалар – иззатда. Ҳар бир оилага бошпана олишнинг янги имкониятлари берилди. Ҳукуматга маоши кам ишчиларнинг меҳнат ҳақини ошириш учун солиқ миқдорини камайтириш, олий таълим олиш имконияти ва сифатини ошириб, талаба ёшларнинг ётоқхонадаги аҳволини яхшилаш, кичик насиялар беришни кўпайтириш, мамлакатни табиий газ билан таъминлашни давом эттириш ва бошқа қатор муҳим вазифалар топширилди.
“Нур Отан” партиясининг сайловолди шиори – “Бизни олдинда эзгу, буюк ишлар кутмоқда”. Элбошимиз таъкидлаганидай: «Қозоғистон – Мангу Элга айланади. Шуни ишонч билан, фахр билан айтамизки, истиқлол бизни буюкликка элтади”.