Рамазон ойининг биринчи кунида ҚР Дин ишлари ҳамда фуқаровий жамият вазири Нурлан Ермекбаев ҳамда Жанубий Қозоғистон вилояти ҳокими Жансейит Туймебаев Шимкент шаҳридаги  3-сонли болалар уйи фаолияти билан та­нишдилар. Вазир болалар уйига энг сўнг­ги русумдаги тиббий физиокабинетга мўлжал­ланган “Бином” ускунасини тақдим этса, минтақа раҳбари 20 нафар тарбияланувчига ЭКСПО-2017 кўргазмасига чипталар ҳадя қилди.

– Бу масканда болаларнинг беташвиш ўсиб-улғайиши, ўқиши, фуқаро сифатида шаклланиши учун барча шароитлар муҳайё бўлиши лозим. Шу боис муассаса ходимлари зиммасига улкан масъулият юкланган, – деди вилоят ҳокими Жансейит Қансейитули ва болаларнинг Астанага бориб-қайтиш  харажатларини ўз зиммасига олишини маълум қилди.

Ушбу муассаса йил бошидан буён ҚР Дин ишлари ҳамда фуқаровий жамият вазирлигининг оталиғига олинган эди. Ҳозирги кунда бу ерда 3 ёшдан 11 ёшгача бўлган 68 нафар етим ҳамда ота-она ғамхўрлигисиз қолган болалар тарбияланади.  45 нафар ходим меҳнат қилади. 

2016-2017 йиллар оралиғида болалар уйининг 9 тарбияланувчиси ғамхўрликка, 3 нафари патронат тарбияга берилиб, 6 бола ўз оиласига қайтарилган.

Тарбияланувчиларнинг ҳаммаси уй навбатига қўйилган. Етим болаларнинг нафақалари ўз ҳисоб-рақамларига тушиб туради. 46 нафар мактаб ёшидаги бола шаҳардаги 33-сонли Қ. Қасимули номидаги умумий ўрта мактабда таълим олмоқда. 22 бола мактабгача тарбия гуруҳларида.

Болалар уйидаги ўқув-тарбия тадбирлари қозоқ ти­ли­да юритилади. Рақс, вокал, ҳунармандчилик тў­га­ракларида 58 бола иштирок этади. Дарсдан бўш вақтларда турли тадбирлар уюштирилади. Болалар ўқув воситалари билан тўлиқ таъминланган.