Келес туманида йилига 400 минг дона совун ишлаб чиқариладиган корхона очилди. 

Келгусида у Тожикистон, Афғонистон каби давлатлардан буюртмаларнинг кўпайиши муносабати билан ишлаб чиқариш қувватини янада оширмоқчи. Элбошининг кичик ва ўрта тадбиркорликка ғамхўрлиги туфайли Келес тумани, Абай қишлоғида яшовчи Ўмирсерик Алтинбаев ўз маблағи ҳисобидан “Qagaz” кичик цехини очиб, 7 нафар ҳамқишлоғини доимий иш билан таъминлади.

 Цех кирсовун ва таҳорат қоғозини ишлаб чиқаради. Бу лойиҳанинг асосий мақсади – чиқиндиларни қайта ишлаш орқали кундаликда фойдаланиладиган буюмлар билан туман бозорини таъминлаш. 

0,13 га. ер участкасида қурилган корхонанинг умумий қиймати 40 млн. тенгени ташкил этади. 1 кунда 1000 дона, йилига 400 минг дона кир совун ишлаб чиқарилади. Кунига 4000-5000 дона, йилига 1,5-1,9 млн. дона қоғоз ишлаб чиқариш режаланган. Асосий истеъмолчилар Келес туманида. Шунингдек, Шимкент шаҳри ва Қизилўрда вилоятига ҳам маҳсулот жўнатилмоқда. 

Тадбиркорни Келес тумани ҳокими Ўмирсерек Алибайули қабул қилиб, лойиҳалари билан танишиб чиқди. Келгусида кичик корхонани ривожлантириш учун ҳокимлик томонидан барча қўлловлар кўрсатиладиган бўлди.