Янги йил байрами арафасида Тулкибош туманида 64та оила уй тўйини нишонлади. Тантанали тадбирда қатнашган Туркистон вилояти ҳокими Жансейит Туймебаев уй эгаларини табриклаб, уларга квартира калитларини топширди.

Састўбе кентидаги 32 квартирали икки қаватли уй қурилишини пудратчи корхона – “Корпорация АҚ ордасы” МЧБ юритган. Умумий қиймати 298,9 млн. тенге. Уйлар бошпана учун навбатда турган, ота-онасидан айрилган болалар, бюджет ходимлари ва боқувчисиз қолган оилаларга берилди. 

Айтганча, туманда 1600дан зиёд фуқаро уйга навбатда турибди. Келаси йили улардан 60 нафарига квартира калити топширилади, деб мўлжалланмоқда. 

Шу билан бирга, Балиқчи овулида икки қаватдан иборат 10 квартирали ижтимоий ходимларга мўлжалланган уй фойдаланишга берилди. Унинг қурилиш ишлари билан пудратчи корхона – “Евро Ремонт Сервис” МЧБ шуғулланган. 

2019 йили Турар Рисқулов қишлоғида қўшимча яна икки қаватли 10та квартирали уй фойдаланишга топширилади. Давлат хизматчиларига мўлжалланган бошпана туманга ишга келган ёш мутахассисларга берилади.