Шимкент педагогика университетининг мажлислар залида таниқли шоира, халқаро “Алаш” мукофоти совриндори Ханбиби Есенқараеванинг Астана шаҳрида чоп этилган 10 жилдлик асарлари тақдимоти ўтди. Тадбирни бошқарган мазкур олий ўқув юрти раҳбари Ў. Аяшев залга тўпланган зиёлилар, устозлар, ОАВ вакиллари ҳамда талабаларни шоиранинг таржимаи ҳоли билан таништириб, унинг эътибор ва эътироф қозонган ижодкор эканини таъкидлади. Дарҳақиқат, унинг қозоқ адабиётига қўшган салмоқли ҳиссаси тўғрисида Ч. Айтматов, 

М. Шаханов, А. Кекилбаев, Қ. Қайсенов, Б. Мўмишули каби машҳур давлат арбоблари, ёзувчи ва шоирлар ҳам қимматли фикрлар билдиришган. Жумладан, Х. Есенқараеванинг ижодини баҳолаган таниқли қозоқ шоираси Ф. Ўнғарсинова: “Қозоқ жирининг муқаддимаси Бухор Жировдан бошланадиган улкан бир жилд бўлса, Ханбибининг шоиралик ижодини шу олтин ҳарфли жилднинг зарварағи дейиш мумкин”, – деган эди.

Дастлаб сўз олган Шимкент шаҳри ҳокимининг биринчи ўринбосари Қ. Нуртас ижодкорга шаҳар ҳокими Ғ. Абдирахимовнинг табригини етказиб, унга Ташаккурнома ва совға тақдим этди. 

Шундан сўнг таниқли ёзувчи М. Байғут Х. Есенқараеванинг насрий асарлари тўғрисида, меҳнат фахрийси, шоир Қ. Тўретай эса унинг назмиёти ҳақида маъруза қилдилар. Университет проректори Б. Исабек унинг тарихчи сифатида “Алаш” партияси етакчилари, шунингдек, сиёсий қатағонга учраган қозоқ зиёлиларининг ҳаёти ва ижодини ўрганишдаги жонбозлигини таъкидлади. 

Учрашув якунида шоира университет раҳбарияти ва мухлисларига кўрсатилган ҳурмат-эҳтиром учун самимий миннатдорчилик изҳор этди.