31 май куни Элбоши Ақмўл қишлоғидаги қатағон қурбонлари ёдгорлигига гулчамбар қўйди. Бу ерда Сталин тузумидаги оммавий жазолаш лагерларидан бири – Ақмўла ватан хоинлари рафиқалари лагери жойлашганди. Қозоғистон Республикаси Президенти сиёсий қатағон ва тоталитаризм қурбонларининг оила аъзолари билан суҳбатлашди. Сўнг, оммавий ахборот вакиллари билан учрашди.

– 31 майда биз умуммиллий сиёсий қатағон қурбонларини хотирлаш ва ҳамдардлик кунини нишонлаймиз. Ўша йилларда фақат Қозоғистоннинг ўзида 103 минг шахс қамоққа олинган, 25 минг одам отиб ташланган. Қозоқ зиёлилари, республика етакчилари йўқ қилинган, – деди Нурсултан Назарбаев.

Қозоғистон Президенти ўша вақтларда яратилган лагерлар ва улардаги шарт-шароитни эслатди. 

– Одамлар Қозоғистон бўйлаб қурилган 11та лагерда қийноқлардан ҳалок бўлар эдилар. Уларда 1 миллиондан ортиқ фуқаро жафо чеккан. Сиёсий арбоблардан ташқари, уларнинг рафиқалари ва болалари ҳам қатағон қилинганди, – деди Давлат раҳбари.

Нурсултан Назарбаев ўта мураккаб даврда бемисл зулмни бошидан кечирган кўплаб этнос вакиллари учун Қозоғистон она Ватанга айланганини ҳам кўрсатиб ўтди.   

– Халқимиз тарих сабоқларини унутмаслиги, келажак авлод бундай даҳшатларга йўл бермаслиги  керак. Биз бугун ҳуқуқий давлат қурмоқдамиз. Қозоғистон фуқаролари ҳуқуқ ва эркинликлари ҳимояланган. Биз тараққиётнинг эволюцион йўлини танлаганмиз, – деди Элбоши. 

Сўзининг сўнггида Давлат раҳбари ўтмишни ёддан чиқармаган ҳолда бугунги куннинг қадрига етишга чақирди.