Туркистон шаҳрида замонавий мусиқа оламида муносиб ўринга эга ёш истеъдодли хонанда Фарҳод Тожиметов янги йил арафасида вилоят ҳокимлигининг “Ижтимоий тотувлик” давлат муассасаси томонидан ташкил этилган ватанпарварлик мавзуидаги қўшиқлар танловида фахрли учинчи ўринга лойиқ деб топилиб, диплом ҳамда 100 000 тенге пул мукофоти билан тақдирланди. 

Фарҳоднинг илк устози мусиқа мактаби ўқитувчиси Пўлат Қаюмовдир. Ўрта мактабдан сўнг Жанубий Қозоғистон мусиқа коллежида гитара синфини муваффақиятли тамомлаган. Фарҳод 2014 йили Туркистонда ўтказилган «Офарин» танловида олий мукофотга сазовор бўлди. Ўзбек, қозоқ, рус, қорақалпоқ ва уйғур тилларида, жами 17та муаллифлик қўшиғини яратган. Шимкентдаги танловда давлат тилида «Туркистон» қўшиғини ижро этди. Унинг сўзини Б. Аристан ёзган, мусиқасини Б. Таумет басталаган. Наврўз айёмига тайёргарлик кўраётган Фарҳод Туркистон, Шимкент, Алматида концерт дастурларини намойиш этиб, мухлислар олқишини қозонди. Туркистондаги «Үлес» ҳайрия жамғармаси раиси Райимжон Қўчқоров ёш истеъдоднинг келажакда янги зафарларга эришишига ишончи комил. Сабаби, Фарҳод Ғайрат ўғли доимо изланиш, ўрганиш ва меҳнат билан банд. Ота-онасининг ишончини оқлаб, мусиқа оламида муносиб ўрин эгаллашига биз ҳам тилакдошмиз.