Туркистон шаҳар тадбиркорлик бўлими раҳбари Гулжамал Маханованинг айтишича, МИМ Туркистондаги индустриявий ҳудуд ёнида ташкил қилинади. Жорий йилнинг учинчи чорагида минтақада лойиҳаларни жойлаштириш ишлари бошланади.

Ҳудуди 400 гектар бўлган майда келажакда 200та лойиҳани амалга ошириш режалаштирилган. Ҳозирги кунда тадбиркорлик бўлими ҳужжатлаштириш ишларини юритмоқда. Яқин орада инфратузилма тармоқларини тортиш ишлари бошланади. Лойиҳаларни саралаш, амалга ошириш билан махсус иқтисодий минтақа дирекцияси  шуғулланади. 

– Шу кунларда индустриявий минтақага барча инфратузилма шохобчалари тортилган. Уларни энди махсус иқтисодий минтақага чўзамиз. У ерга ҳам сув, электр қуввати, газ етказилади, – деди бўлим раҳбари.

Махсус иқтисодий минтақада амалга ошириладиган лойиҳалар давлат томонидан имтиёзларга эга бўлади. Аниқроқ қилиб айтганда, чет элдан олиб келинган буюмлардан божхона солиғи олинмайди, шунингдек, тадбиркорлар 10 йилгача ердан бепул фойдаланади, коммунал тарифлар тўлови эса 35 фоизгача арзонлаштирилади. 

Вилоят марказида саноат минтақасини жадал ишга тушириш учун бугунги кунда шаҳар ва вилоят ҳокимлиги тегишли ишларни амалга оширмоқда.