ёхуд тарбияни тарбиясиздан ўрган
Одатдагидай болаларимни олиб, бирини мактабга, иккинчисини боғчага қўйиб, ўзим ишга йўл оламан. Олдимизда кетаётган катта ёшдаги аёлнинг ерга қандайдир ахлат ташлаганини кўрган тўрт ёшли қизим:
– Ойи, анави опоқини қаранг, тарбияси йўқ экан, ахлатни ерга ташлаб кетяпти, – деди.
Ўғлим эса:
– Экологияни бузяпти, – деб қўшимча қилди.
Фарзандларимга кичкиналигидан тарбия кўрмаган инсонларгина кўчани ифлослайди. Одамлар ахлатни кўчага ташлайверса, шаҳримиз ахлатхонага айланади. Оқибатда экологиямиз бузилиб, биз нафас олаётган ҳаво ифлосланади, касалликлар кўпаяди, деб уқтириб келаман.
Шундай деймизу, айрим “тарбия кўрган”, лекин фаросатсиз (ўша аёл каби) одамлар орасида, “менга нима, кўча супурувчилар шуни тозаламаганда нима иш қилишади, шунга яраша пул олишади-ку”, дейдиганлари йўқ эмас. Фаррошларга менсимай, паст назарда қарайдиганлар ҳам топилади.
Кўча тозаловчилар турли мамлакатларда қандай ишлайди ва уларга эҳтиёж қандай?
Ушбу касбга дунёнинг деярли барча бурчакларида жуда ҳам эҳтиёж катта. Чунки шаҳар кўчаларининг тозалиги улар маданиятининг асосий кўрсаткичидир.
Масалан:
Германияда: немислар синчковлик ва жиддийлик хислатлар билан бошқа миллатлардан ажралиб туради. Уст боши ифлос, маст ҳолда кўча тозалайдиганлар немисларга хос эмас. Германияда уларни 3 йил давомида курсларда ўқитиб, юқори тоифали мутахассис бўлгандагина ишга олишади. Шунга яраша бошқа давлатларга қараганда ойликни ҳам яхши тўлашади. Маошдан ташқари уларга зарарлиги, об-ҳаво бузилган кунлари ва тунги сменаларга тўғри келганлиги учун қўшимча пул тўлашади.
Беларус мамлакатига келсак, пойтахти Минск шаҳри собиқ Иттифоқ даврида энг тоза шаҳар мақомини олган. Мустақиллик йилларида ҳам бу давлат тозалик талабларига содиқ қолди. Шу сабабли, хорижлик сайёҳлар бу давлатни Европа марказидаги тозалик эталони деб биладилар. Бундай тозалик давлатга арзон тушмаслиги аниқ. Чунки, кўча тозаловчилар кўп ойлик олишмасада, маоши университет профессорлари, шифокор, ўқитувчиларникидан анча кўп.
Россияда Москва ва Питер кўчаларини тозалаётганларнинг 90 фоизи Тожикистон, Ўзбекистон, Озарбайжондан борган меҳнат муҳожирлари. Лекин мамлакатда жиноятларнинг 70 фоизи улар томонидан содир этилаётгани ҳам аччиқ ҳақиқат. Чунки уларнинг маоши кам, яшаш шароитлари оғир. Москва учун бу касб ўта хавфли. Шаҳарда ҳар йили юзлаб фаррошлар ҳалок бўлади. Россиянинг бошқа шаҳарларида аҳвол бирмунча яхши. Чунки, шаҳар қанчалик кичик бўлса, муаммолари ҳам кам бўлади.
Нозик елкаларингда юртнинг поклиги...
Кунига ишга кетаётганимда кўчамизни тозалаётган чамаси 50 ёшлардаги аёлга кўзим тушади. Ҳатто ёмғирли-қорли кунларда ҳам одамлар юрадиган йўлакчаларни тозалаётган бўлади. Олдига бориб, суҳбатлашгим келарди-ю, бироқ, рози бўлармикин, деб ботинмасдим. Ахийри бир куни ўзимда куч тўплаб, олдига бориб, салом бердим. Биров билан гаплашгиси келганми, гапимиз қовушиб кетди. “Югдорсервис” МЧБ ходими, исми Райҳон экан.
Туғма ногиронлиги туфайли турмушга чиқмаган ва шу сабабли яқинларимга оғирлигим тушмасин, деб ёлғиз ўзи ижарада яшаркан. Мактабни аъло баҳоларга битирган, лекин шароити тўғри келмай, ўқишга тушолмаган экан.
– Райҳон опа, айтингчи, неча йилдан буён бу корхонада ишлаб келасиз, шароитларингиз қандай, ногиронларга имтиёзлар борми, маошни яхши тўлашадими?
– Бу ерда ишлаётганимга 10 йил бўляпти. Илгари сомсахонада ишлардим. 2008 йили ҳозирги бригадиримиз ўтиб кетаётиб, қизларимизни кўрмадингми, деб сўраб қолди. Кейин эса бизга ишга кирмайсанми, барқарор маошинг бўлади, деб таклиф қилганди. “Озодаликда файз-барака бор”, деб шундан бери ушбу ташкилотда ишлаб келаман. Тонгги соат 6дан 13.00гача ишлайман. Одамлар ишга боргунича биз йўлакчалар, йўлларни тозалаб қўйишимиз керак, айниқса, қор ёққан кунлари биринчи навбатда одамларга юриш осон бўлсин, деб йўлакчаларни тозалаймиз. 5-6та одамдан гуруҳларга бўлиб қўйилган. Ҳар биримизга тозалайдиган жойимиз белгилаб берилган. 50 минг тенге ойлик маош оламан. Байрамларда ҳар бир гуруҳдан бир ходимга мукофот пули берилади. Янги йилда барчамизга совға ҳадя этишади. Ногиронлигим туфайли оғир ишларни қилмайман. Уларни кўпроқ эркакларга топширишади.
– Шу вақтгача, масалан, Сиз кўчани супураётганингизда олдингиздан ўтиб кетаётган одамлар тозалаётганингизни кўриб туриб ахлат ташлаб кетган ҳолатлар бўлганми ва бундай вазиятда қандай йўл тутардингиз?
– Бундай ҳолатлар кўп бўлган (кулади). Лекин беш бармоқ бирдаймас. Ҳар хил одамлар бор. Уларнинг ҳар бирига гапириб ёки кўнглимга олиб яшасам, унда яшашнинг ҳожати қолмайди. Бизда шундай тартиб бор, кўчада кетаётган одамлар ахлат ташлайдими, масхара қилиб гапиришадими, нима бўлганда ҳам, биз ҳеч ким билан тиллашмаслигимиз, урушмаслигимиз керак. Чунки, раҳбариятимизга ҳам бундай муаммолар керак эмас. Тинчгина ҳеч кимни эшитмаган, кўрмагандай бўлиб ишингизни бажариб юраверинг, дейишади.
Бир куни бир воқеа бўлди. Қор қалин ёққан кун. Одамлар чиқишидан олдин совуқда қийналиб, энгашиб йўлакчаларни тозалаяпман. Кимдир белимдан босиб ўтиб кетди. Қарасам, бир киши мендан тиргак сифатида фойдаланиб, кичкина ариқчадан сакраб ўтган экан. Ёнимдаги шерикларим уни кўриб, шунақа жаҳллари чиқди. Шунда ёмон кўнглим оғриган, йиғлаб юборганман.
– Райхон опа, навбатдаги саволим қалбингизга оғир ботса, олдиндан узр сўрайман. Ёлғиз яшагандан кўра, ҳеч бўлмаса, фарзанд асраб олишни...
– Мен ҳозир ўзим оғир шароитда яшаяпман. Бола асраб олсам, мен унга қандай келажак яратиб бераман. Ўзим қийналганим етмаганидай, уни ҳам қийнаб қўяманми, деб ўйлайман. Лекин, Аллоҳга шукр, ёлғизман, деб нолимайман. Ҳеч кимим йўқ деб ҳам айтмайман. Опа-сингилларим, қариндош-уруғларим бор. Улар билан борди-келди қилиб тураман. Аллоҳ берган умрни чиройли ўтказишга ҳаракат қиламан.
– Суҳбатингиз учун раҳмат!
P.S. Ҳар бир инсон ҳаётда ким, қандай касб эгаси бўлишидан қатъиназар, Райҳон опа каби ҳар бир куннинг қадрига етиб, бировларнинг кўнглини оғритмай яшашга интилса, турмушимиз фаровон бўлиб, муаммоларга ўрин қолмасди, назаримда.