Туркистон шаҳрининг фахрий фуқароси Тиловберган Худойберганов асос солган, фарзанди Қудрат Тиловберган ўғли ривожлантириб, ишлаб чиқаришни кенгайтираётган Чўрноқдаги мебель корхонасида бир неча йил муқаддам электромотоциклларни ишлаб чиқариш йўлга қўйилганди. 

Аккумулятор ёрдамида соатига 60 километр тезликда 250 кг юк билан ҳаракатланувчи темир тулпорларнинг дастлабкилари шу ерда йиғилиб амалда фойдаланилмоқда. Эҳтиёт қисмларнинг асосий улуши маҳаллий муҳандислар ихтироси самарасидир. Вилоят ҳокимлиги мутасаддилари мазкур янгиликдан воқиф бўлиб, уни муносиб баҳоладилар ва бошқа ишлаб чиқаришларда ҳам фойдаланиш зарурлигини тавсия этдилар. Астанадаги халқаро ЭКСПО–2017 кўргазмасининг асосий мақсади муқобил энергия манбаларини амалда қўллаш орқали янгиликларни жорий этиш бўлса, ушбу масала Туркистоннинг Чўрноқ қишлоғида электромотоцикл мисолида ўз амалий ечимини топди, деб ҳисоблаш мумкин. 

Суратда: корхона раҳбари Т. Худойберганов ҳамқишлоқлари Қ. Ирисбеков ва ҳамкасблари даврасида электромотоциклларни кўздан кечирмоқда. 

Муаллиф тасвири.