15 йил муқаддам умумий овқатланиш нуқтасини ишга туширганида тадбиркор бугунги кунга келиб ўзи яратган ошхоналар тармоғининг нафақат Шимкентда, Қозоғистоннинг бошқа шаҳарларида ҳам машҳур бўлиб кетишини тасаввур ҳам қилмаган бўлса керак. 2005 йили Адҳам ака ва Муқаддас опа Умаровлар кичик тамаддихона очдилар. Мижозлари – мактаб ўқитувчилари, ўқувчилари, даҳа аҳолиси учун махсус тайёрланган турли мазали пишириқлари билан танила бошладилар. 2007 йили эса “Каравай” тамаддихонасини ишга туширишди. Мижозларга пишириқлар билан бирга турли таомларни ҳам тавсия эта бошлашди. Ходимлари сони орта борди. Йил сайин унинг янги шохобчалари очилиб, маҳсулотлари харидоргир бўла бошлади. Натижада – бу ном ўзига хос бозор тили билан айтганда, брендга айланди.
Ўтган йили эса корхона Forbes.kz журналининг made in Kazakhstan лойиҳасида иштирок этди, ҳамюртларимизга янги бренд таништирилди. Янги услубда фаолият юритаётган тамаддихоналар тармоғи – “Каравай KZ” МЧБ бош директори Адҳам Умаров билан учрашиб, корхонанинг муваффақияти сири хусусида суҳбатлашдик.
Унинг ошхоналарида ўрта ҳисобда 500 тенгега тўлақонли тушлик қилиш мумкин. Ушбу йўналишда ҳамкорлик қилишга Қозоғистоннинг бошқа шаҳарларидаги тадбиркорлар ҳам қизиқиш билдиришмоқда. Арзон ва ҳамёнбоп лойиҳа, аввало, аҳолининг асосий қисмини ташкил этувчи ўрта даромадга эга ҳамюртларимизга маъқул келмоқда. Шаҳримизда шу номдаги тамаддихоналар сони еттитага етди. Уларнинг иккитаси тамомила янги услубда иш юритмоқда.
Айтганча, “Каравай” ошхоналарида кунига 3 мингга яқин киши тамадди қилишга улгуради. 2017 йил октябрда ошхона бир ҳисобчи билан хизмат кўрсата бошлади. Тайёр таомлар бир марталик идишларга қадоқланган. Мижозлар эса микротўлқинли печда уни иситиб, тановул қилаверади. Шу тизим туфайли кутиш вақти 25 дақиқадан 2 дақиқага қисқарди.– Биз, фаолиятимизни бироз ихчамлаштирдик. Аввал ҳар бир ошхонага алоҳида маҳсулот етказиб берувчилар хизмат кўрсатишарди. Ҳозир битта ошхона-фабрикамиз бўлиб, унда тайёрланган таомлар бошқа тармоқларга етказиб бериляпти, – дейди А. Умаров. – Айни дамда корхонамизда 120 киши меҳнат қиляпти. Қизилўрдада ҳам ошхона очдик. Қизилўрдалик тадбиркорлардан яна 4 нафари бу лойиҳага қизиқиш билдирмоқда. Европа тажрибасини амалга жорий этишни режалаяпмиз. Айни дамда эса Москвадаги “Му-му” ошхоналар тармоғининг тажрибасини қўллаяпмиз. Москванинг ўзида унинг 30та бўлими фаолият юритиб, ошхоналари мижозларига тайёр маҳсулот, ярим фабрикатларни етказиб бериш билан шуғулланар экан. “Динамо” хоккей стадиони тамаддихонаси фаолияти билан ҳам танишиб чиқдим. Улардан ўрганадиганимиз анчагина. Чунончи, битта фабрикада 200 одам ишлайди, биз эса 20 киши 50 минг кишига хизмат қиладиган тизим устида иш олиб боряпмиз. Озиқ-овқат хавфсизлигига эътибор қаратилмоқда, андазаларга ўзгартишлар киритяпмиз. “Ҳалол” андазасини олиш устида ишлаяпмиз. 2016 йили январда Назарбаев университетида ишбилармонларга ўтказилган тренингда иштирок этдим. Хорижлик ҳамкорлар фаолиятини ўрганиб, бизнес-режамга мувофиқ малака ошириш грантига эга бўлдим. Италия, Германия тадбиркорлари фаолияти билан яқиндан танишдик.
– Корхонангизни нима учун “Каравай” деб номладингиз?
– Биз меҳмонларимизни нон ва туз билан қарши оладиган халқмиз. Ниятимиз Россия бозорига чиқиш бўлгани боис, англашга ҳам, талаффузга ҳам осон халқаро атама танладик.
– Қадоқланган таомларнинг яроқлилик муддати қанча?
Қадоқланган таомлар 70 даражадан 25 даражагача кескин совитилади. Ва бу маҳсулот 21 кунгача бузилмайди. Мана шу тизимида мамлакатимизнинг барча минтақаларига тайёр таомлар юбориш мумкин. Бу бизнесни ихчамлаштириш дегани. Тайёр маҳсулотларимиз тадбиркорлар, энди иш бошлаётган ишбилармонлар ишини осонлаштиради. Шу боис ҳам ҳозир кўпгина хусусий корхоналар билан ҳамкорлик ўрнатдик. Йирик саноат корхоналарига хизматларимизни таклиф этяпмиз. Тайёр таомлар уларга айтилган вақтда етказиб берилади. Ходимлар эса иш жойини тарк этмаган ҳолда уй шароитида тайёрланган мазали ва калорияли таомни истеъмол қилишади. Арзон ва сифатли маҳсулотнинг жойларга етказиб берилиши бизнинг ҳамкорларимизни қизиқтираётган асосий жиҳатлардан бири. Ва мижозларимиз ҳам бундай хизматдан рози.
– Келгуси режаларингиз билан ўртоқлашсангиз...
– Россия бозорида маҳсулотларимизни намойиш этсак... Қозоғистонда ишлаб чиқарилган таомлар у ерда ҳам харидоргир бўлса. Айни пайтда Алмати, Астана, Қизилўрда, Тароз, Туркистон ва бошқа шаҳарлар ишбилармонлари билан музокаралар олиб боряпмиз.
– Суҳбатингиз учун раҳмат! Қозоғистонда янги йўналишда самарали ишлаётган оилавий бизнесингизга муваффақият тилайман.