Президентимиз Нурсултан Назарбаев ёшлар билан учрашувларда уларнинг жамиятимизда етакчи куч эканлигини доимо таъкидлайди. Бу бежиз эмас. 2019 йил – "Ёшлар йили" деб эълон қилиниб, Элбоши мутасадди вазирликларга уларнинг ижтимоий-сиёсий фаоллигини ошириш, сиёсий-ҳуқуқий билими, дунёқарашини бойитиш ҳамда фаол фуқаролик позициясини шакллантириш, ташаббус ва ғояларини қўллаб-қувватлаш, истеъдод ва салоҳиятини юзага чиқариш, илмий-ижодий фаолиятини рағбатлантиришни топширди.

Зеро, ёшларнинг ҳуқуқий онги ва маданиятини юксалтириш, уларни мамлакатимизда ва дунёда бўлаётган ўзгаришлардан бохабар этиш, ижтимоий-сиёсий фаоллигини ошириш орқали юрт тақдирига дахлдорлик туйғусини кучайтириш бу борада муҳим аҳамиятга эга.

 Вилоятимизда ҳам ёшларга эътибор катта. Айниқса, "Нур Отан" партияси «Ёшлар қаноти» билан биргаликда сиёсий салоҳиятга эга, истеъдодли, ташаббускор ва ташкилотчи ёшларни аниқлаш мақсадида “Ёш сиёсий билимдонлар” клуби аъзолари ўртасида кўрик-танловлар, фестиваллар, турли маънавий-маърифий тадбирлар ўтказилмоқда. 

Жорий йилнинг ёшларга бағишланиши бизга катта куч-ғайрат бағишлади, бундан илҳомланиб, янада юксак чўққиларни забт этишга интиламиз.