Муаллифларнинг фикрича, у турналар галаси парвозининг рамзий ифодасидир. “Парвознинг айнан шу усули йирик қушларга кўп қувват талаб қиладиган олис масофаларни босиб ўтишга ёрдам беради. Ҳар бир қуш қанотининг учида ҳаво гирдоби пайдо бўлиб, сал орқада учаётган тоифадошини қўшимча куч билан таъминлайди. Биргаликдаги муваффақиятли парвознинг бош қоидаси – гуруҳ сифатида барчанинг меҳнатлари самарадорлигини таъминловчи ҳалол муносабат”, деб изоҳлашди буни Ижтимоий тараққиёт вазирлигида. Маҳкамада айтишларича, ушбу шарҳ ёшлар ўзаро ҳаракати тамойилини ҳар қачонгидан ҳам яхшироқ ифодалайди.

“Зеро, турналар мангу ёшлик, бахт ва омаднинг рамзи ҳисобланади, ёшлар сиёсатидаги асосий ютуқларга эса ёшларнинг биргаликдаги ҳаракатлари, тажрибалар алмашуви ва билимлар трансфери туфайли эришилади. Логотип муаллифлари унинг ранглари жилосини ўзига хос мазмунга ҳам йўғиришган” дейилади хабарда.

Қизил ранг – муҳаббат, мардлик, меҳнат рамзи. Сариқ – ижобий қувват, байрам, қуёш, зангори – ижодий салоҳият ва дўстлик. Кўк – олижаноблик, маънавий поклик ва комиллик ранги, тўқ сариқ ранг – таянч, барқарорлик, қувонч, дилкашлик рамзидир.