Ажрашишлар бўйича Қозоғистон бир неча йилдан бери етакчилар сафида келмоқда. Статистика кўрсаткичлари мамлакатимизда ҳар учинчи жуфтлик ажрашаётгани хусусида бонг урмоқда. Бу маълумотлар дилимизни оғритади.

Етарлича комил ёшда: 30 билан 45 ёш атрофидаги ҳамюртларимизнинг бундай қарорга келишаётгани кишини ташвишлантиради. Оилавий муносабатларда инсон менталитети, оилавий қадриятлар муҳим роль ўйнайди. Шимкент шаҳри бўйича судлар маъмури ахборий таъминот бўлими бошлиғи Қабил Дуйсенбидан олинган ахборотга кўра, 2017 йили вилоят судларига никоҳ-оила муносабатларидаги баҳслар бўйича 10359та ариза келиб тушган, улардан 6935тасига қарор чиқарилган, 6690таси қаноатлантирилган. 1201 никоҳ медиация асосида тикланган, 27 нафар оила тотувлашган. Айнан шу йилги кўрсаткичлар бўйича вояга етмаган болаларнинг алиментини ундиришга 5648та ариза топширилган. Улардан 5524тасига буйруқ чиқарилган. 2018 йилнинг 5 ойи мобайнида эса бу кўрсаткичлар қисман камайган. Яъни 3876та никоҳ муносабатларидаги келишмовчилик юзасидан 3876 ариза келиб тушган. Уларнинг 2110 таси қаноатлантирилди. Худди шу вақт мобайнида болалар учун алимент ундиришга 2073та ариза топширилган бўлса, улардан 2012тасига буйруқ чиқарилган. 

Бироқ ёшларни яраштиришда ҳуқуқшунослар, яъни медиаторларнинг ҳам ҳиссаси сезиларли эканлигини таъкидлаш жоиз. Жанубда онгимизга сингиб қолган оила муқаддаслиги тўғрисидаги тушунчалар, кундалик муносабатларда сабр-тоқат, анъналарнинг муҳим роль ўйнашини эътиборга олсак, ажрашишлар бўйича республика кўрсаткичида улушимиз камроқ эканлигига шак-шубҳа йўқ.